ក្រុមមន្រ្តីក្នុងស្រុក និយាយនៅថ្ងៃព្រហស្បតិ៍នេះថា យានដ្រូនរុស្ស៊ី បានបំផ្លិចបំផ្លាញហេដ្ឋារចនាសម្ព័ន្ធថាមពលនៅទីក្រុងភាគខាងជើង Konotop ប្រទេសអ៊ុយក្រែន អំឡុងការវាយប្រហារកាលពីយប់កន្លងទៅ ដែលបណ្តាលឲ្យមនុស្ស ១៤នាក់ រងរបួស និងកាត់ផ្តាច់ចរន្តអគ្គិសនីដល់តំបន់ឈរជើងរបស់ទាហានអ៊ុយក្រែន ។ 

វីដេអូដែលបញ្ចេញដោយសេវាកម្មថាមពលអ៊ុយក្រែន ឃើញក្រុមជួយសង្រ្គោះ និងក្រុមភ្នាក់ងារពន្លត់អគ្គិភ័យ ធ្វើការនៅអគាររងការឆាបឆេះ ។

ក្រុមជួយសង្រ្គោះ កំពុងធ្វើការ ដើម្បីស្តាថាមពលអគ្គិសនីនៅក្នុងទីក្រុង Konotop ដែលកាលពីមុនសង្រ្គាមមានពលរដ្ឋរស់នៅប្រហែល ៨៣.០០០នាក់ ។ 

ក្រុមមន្រ្តីក្នុងតំបន់និយាយថា មាននូវការផ្ទុះគ្រាប់ ១០លើក អំឡុងការវាយប្រហារនេះ ហើយលោក Artem Semenikhin គឺជាអភិបាលក្រុង Konotop និយាយថា ប្រព័ន្ធថាមពល ស្ថិតក្នុងស្ថានភាពធ្ងន់ធ្ងរ ។

ទីក្រុង Konotop គឺជារដ្ឋធានីមួយស្ថិតក្នុងតំបន់ Sumy ដែលរងការវាយប្រហារជាពិសេសដោយរុស្ស៊ី ក្នុងរយៈពេលប៉ុន្មានសប្តាហ៍កន្លងមកនេះ ក្រោយអ៊ុយក្រែន ប្រើប្រាស់ទីនេះជាតំបន់ឈរជើងសម្រាប់ការវាយប្រហារដ៏គួរឲ្យភ្ញាក់ផ្អើលរបស់ពួកគេចូលទឹកដីរុស្ស៊ី កាលពីខែមុន ។

កងទ័ពអាកាសអ៊ុយក្រែន និយាយថា ការវាយប្រហារទីក្រុង Konotop គឺជាផ្នែកមួយនៃការវាយប្រហារទ្រង់ទ្រាយធំរបស់រុស្ស៊ី ដោយប្រើប្រាស់យានដ្រូន ៦៤គ្រឿង ក្នុងនោះ យានដ្រូន ៤៤គ្រឿង ត្រូវបានគេបាញ់ទម្លាក់នៅតាមតំបន់ចំនួន ៩ផ្សេងៗគ្នា ៕