អង្គការសុខភាពពិភពលោក(WHO) និយាយនៅថ្ងៃព្រហស្បតិ៍នេះថា ពួកគេបានជម្លៀសមនុស្សជិត ១០០នាក់ រួមទាំងកុមាររាប់សិបនាក់ផងដែរ ចេញពីតំបន់ហ្កាហ្សាទៅកាន់ប្រទេសអារ៉ាប់រួម នៅក្នុងប្រតិបត្តិការជួយសង្រ្គោះធំបំផុតរបស់ពួកគេ ។

លោក Richard Peeperkorn គឺជាអ្នកតំណាង WHOសម្រាប់ដែនដីប៉ាឡេស្ទីនបិទច្រកមួយនេះ និយាយប្រាប់ក្រុមអ្នកសារព័ត៌មានដោយសំដៅលើប្រតិបត្តិការជួយសង្រ្គោះកាលពីថ្ងៃពុធថា នេះគឺជាការជម្លៀសខ្លួនអ្នកជំងឺធំបំផុតពុំធ្លាប់ដែលមាននៅក្នុងតំបន់ហ្កាហ្សា ចាប់តាំងពីខែតុលា ឆ្នាំ ២០២៣រហូតមក ។

 WHOបានធ្វើការប៉ាន់ប្រមាណថា ជម្លោះរវាងអ៊ីស្រាអែល និងក្រុមហាម៉ាស់ បានបំផ្លាញប្រព័ន្ធសុខភាពនៅហ្គាហ្សាស្ទើតែទាំងស្រុង ហើយមន្ទីរពេទ្យ ១៧កន្លែង ក្នុងចំណោមមន្ទីរពេទ្យ ៣៦កន្លែង បច្ចុប្បន្ននៅដំណើរការដោយអន្លើតែប៉ុណ្ណោះ ។

ច្រកឆ្លងកាត់សំខាន់ Rafah សម្រាប់ការបញ្ជូនផ្នែកវេជ្ជសាស្រ្តចេញពីតំបន់ហ្កាហ្សា ទៅកាន់ប្រទេសអេហ្ស៊ីប បានបិទ ចាប់តាំងពីខែឧសភារហូតមក ពេលដែលអ៊ីស្រាអែលបង្កើនយុទ្ធនាការសឹករបស់ពួកគេនៅតំបន់ភាគខាងត្បូងហ្កាហ្សា ។

លោក Peeperkorn និយាយថា កុមារជាង ៥០ម៉ឺននាក់ នៅតំបន់ហ្កាហ្សា ត្រូវបានផ្តល់វ៉ាក់សាំង នៅដំណាក់កាលដំបូងនៃយុទ្ធនាការបង្ការជំងឺស្វិតដៃជើង ដែលនឹងបញ្ចប់នៅតំបន់ភាគខាងជើងហ្កាហ្សា នាថ្ងៃព្រហស្បតិ៍នេះ ក្រោយរកឃើញករណីឆ្លងលើកដំបូងក្នុងរយៈពេល ២៥ឆ្នាំ កាលពីខែមុន ៕