អគ្គលេខាធិការអង្គការសហប្រជាជាតិលោកAntonio Guterres អំពាវនាវឱ្យបញ្ចប់អំពើហិង្សាក្នុងតំបន់ហ្កាហ្សា បន្ទាប់ពីការវាយប្រហារដ៏សាហាវរបស់អ៊ីស្រាអែលទៅលើជម្រករបស់អង្គការសហប្រជាជាតិសម្រាប់លំនៅឋានជនស៊ីវិលរាប់ពាន់នាក់ដែលត្រូវបានភៀសខ្លួន។

ក្នុងសេចក្តីថ្លែងការណ៍មួយចេញផ្សាយតាមរយៈអ្នកនាំពាក្យរបស់លោក អគ្គលេខាធិការ បានថ្កោលទោសការវាយប្រហារចុងក្រោយរបស់អ៊ីស្រាអែលទៅលើសាលារៀនមួយដែលបម្រើជា ជម្រកនៅតំបន់ Nuseirat កាលពីថ្ងៃពុធ ដែលបានសម្លាប់បុគ្គលិកចំនួន ៦ នាក់មកពីទីភ្នាក់ងារជនភៀសខ្លួនប៉ាឡេស្ទីន UNRWA រួមទាំងមនុស្សរាប់សិបនាក់ផ្សេងទៀត មានស្ត្រី និងកុមារ។ឧបទ្ទវហេតុនេះបង្កើនចំនួនបុគ្គលិក UNRWA ដែលបានស្លាប់ក្នុងជម្លោះនេះដល់ ២២០នាក់ ។ចំណែកប្រមុខការទូតអាមេរិក លោក Antony Blinken បាននិយាយថា បុគ្គលិកអង្គការសហប្រជាជាតិគួរតែត្រូវទទួលបានការការពារ ហើយលោកប្ដេជ្ញាថានឹងដាក់បន្តសម្ពាធលើអ៊ីស្រាអែលឲ្យការពារដល់តំបន់មនុស្សធម៌នៅហ្កាហ្សា។

លោកអគ្គលេខាធិការបន្តការអំពាវនាវឲ្យមានបទឈប់បាញ់ជាបន្ទាន់ និងសម្រាប់ការដោះលែងចំណាប់ខ្មាំងទាំងអស់ក្នុងដែនដីហ្កាហ្សាដោយគ្មានលក្ខខណ្ឌ ព្រមទាំងបញ្ឈប់អំពើហិង្សាដ៏គួរឲ្យរន្ធត់បែបនេះ។ លោកបានហៅការបន្តកង្វះការការពារប្រកបដោយប្រសិទ្ធភាពសម្រាប់ជនស៊ីវិលនៅតំបន់ហ្កាហ្សាក្នុងអំឡុងសង្គ្រាមនៅតែបន្តរវាងអ៊ីស្រាអែល និងក្រុមហាម៉ាសថាជា ទង្វើគ្មានមានសិការ។

តាមរយៈអ្នកនាំពាក្យរបស់លោក អគ្គលេខាធិការរូបនេះ អំពាវនាវឱ្យភាគីទាំងអស់ជៀសវាងការប្រើប្រាស់សាលារៀន ជម្រក និងតំបន់ជុំវិញ ជាគោលដៅយោធា។ ភាគីទាំងអស់ដែលពាក់ព័ន្ធនឹងជម្លោះត្រូវមានកាតព្វកិច្ចគោរពតាមច្បាប់មនុស្សធម៌អន្តរជាតិគ្រប់ពេលវេលា៕