អង្គការមនុស្សធម៌សហប្រជាជាតិ បាននិយាយកាលពីថ្ងៃព្រហស្បតិ៍ថា ប្រធានជំនួយសង្គ្រោះបន្ទាន់ស្តីទី របស់UN មានការខឹងសម្បាចំពោះការកើនឡើងនៃចំនួនបុគ្គលិកជំនួយដែលត្រូវបានសម្លាប់ នៅក្នុងតំបន់ជម្លោះ។

លោកស្រី ចយ ស៊ូយ៉ា (Joyce Msuya) អគ្គលេខាធិការរងស្តីទីដែលដឹកនាំការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានចង្អុលបង្ហាញពីការសម្លាប់ចុងក្រោយនេះ បានកើតឡើងភ្លាមៗ បន្ទាប់ពីទិវាមនុស្សធម៌ពិភពលោក នៅថ្ងៃទី ១៩ ខែសីហា។

បន្ថែមពីលើបុគ្គលិកចំនួន ៦នាក់នៃទីភ្នាក់ងារសង្គ្រោះរបស់UNសម្រាប់ជនភៀសខ្លួនប៉ាឡេស្ទីនដែលត្រូវបានគេស្គាល់ថា UNRWA ដែលត្រូវបានសម្លាប់កាលពីថ្ងៃពុធ ដោយការវាយប្រហារតាមអាកាសនៅតំបន់ហ្កាហ្សា បុគ្គលិកបីនាក់មកពីគណៈកម្មាធិការកាកបាទក្រហមអន្តរជាតិ (ICRC) ត្រូវបានសម្លាប់ នៅក្នុងការបាញ់ផ្លោងមួយ នៅក្នុងប្រទេសអ៊ុយក្រែន កាលពីថ្ងៃព្រហស្បតិ៍។

លោកស្រី ស៊ូយ៉ា បាននិយាយថា ដូចជាជនស៊ីវិលទាំងអស់ដែរ បុគ្គលិកជំនួយ ត្រូវតែត្រូវបានការពារ ពួកគេមិនមែនជាគោលដៅនោះទេ។

នៅក្នុងប្រទេសអ៊ុយក្រែនគណៈកម្មាធិការកាកបាទក្រហមអន្តរជាតិ (ICRC) បានរាយការណ៍ថា បុគ្គលិករបស់ពួកគេ ត្រូវបានសម្លាប់ នៅពេលដែលកន្លែងចែកចាយជំនួយ ដែលបានគ្រោងទុកនៅជួរមុខក្នុងតំបន់ដូណិតស្ក៍ ( Donetsk) នៅភាគខាងកើតនៃប្រទេសនេះ បានរងការបាញ់ផ្លោង។ បុគ្គលិកពីរនាក់ផ្សេងទៀត បានរងរបួស នៅពេលការបាញ់ផ្លោង បានត្រូវចំរថយន្តរបស់អង្គការនេះ។