ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានមានប្រសាសន៍ប្រាប់អ្នករាយការណ៍ពិសេស របស់អង្គការសហប្រជាជាតិប្រចាំកម្ពុជាថា អ្វីដែលកម្ពុជាចង់បានគឺការបង្កើតបរិយាកាសដែលមានជំនឿជឿជាក់ពីគ្នាទៅវិញទៅមក។
នៅក្នុងជំនួបពិភាក្សាការងារតាមវីដេអូ ជាមួយលោកសាស្រ្តាចារ្យ វិទិត មុនតាប៊ន (Vitit Muntarbhorn) អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំព្រះរាជាណាចក្រកម្ពុជា សម្តេចតេជោប្រមុខរាជរដ្ឋាភិបាលបានមានប្រសាសន៍ថា ការមិនទំលាក់កំហុសឱ្យគ្នាទៅវិញទៅមក គឺប្រកបដោយការស្ថាបនា និងបានជំរាបជូនពីកត្តាសំខាន់ៗមួយចំនួនដែលកម្ពុជា ត្រូវរក្សាឱ្យបានជាពិសេសសិទ្ធិរស់រានមានជីវិតជាចំបង ដែលកម្ពុជាដាច់ខាតត្រូវរក្សាឱ្យខានតែបាន។
នៅក្នុងជំនួបនេះ លោកសាស្ត្រាចារ្យ វិទិត មុនតាប៊ន បានគោរព ជម្រាបជូនសម្ដេចតេជោថា៖ឯកឧត្តមពិតជាមានកិត្តិយសណាស់ដែលមានឱកាស បានគោរពជួបពិភាក្សាជាមួយសម្តេចតេជោតាមប្រព័ន្ធអនឡាញនៅថ្ងៃនេះ។ ឯកឧត្ដមបានសម្តែងនូវការកោតសរសើរយ៉ាងខ្លាំងជូនចំពោះសម្តេចតេជោ ក៏ដូចជាចំពោះរាជរដ្ឋាភិបាលកម្ពុជា ដែលបានចាត់វិធានការស្រោចវ៉ាក់សាំងដល់ប្រជាជនកម្ពុជា ដើម្បីទប់ស្កាត់ជំងឺកូវីដ១៩។ក្នុងឱកាសនេះ ឯកឧត្តមក៏បានគោរពស្នើសុំស្វែងយល់ពីសម្តេច,ជាពិសេសអាទិភាពរបស់កម្ពុជា,បញ្ហាសិទ្ធិមនុស្ស, ករណីមេរៀនដែលរៀនបាន អំពីជំងឺកូវីដ១៩នៅក្នុងពន្ធនាគារ, ក៏ដូចជាករណីការពង្រីកលំហសេដ្ឋកិច្ច-សង្គមស៊ីវិល និងនយោបាយ និង សូមគោរព ស្វែងយល់ពីសម្ដេចនូវអ្វីដែលឯកឧត្តម គួរធ្វើ ដើម្បីគាំទ្រដល់កម្ពុជាលើវិស័យសិទ្ធិមនុស្ស។
សូមបញ្ជាក់ថា៖ លោក វិទិត មុនតាប៊ន ត្រូវបានក្រុមប្រឹក្សាសិទ្ធិមនុស្ស នៃអង្គការសហប្រជាជាតិជ្រើសរើស ឱ្យមកកាន់តួនាទីជាអ្នករាយការណ៍ពិសេស ឬ អ្នកស៊ើបអង្កេតពិសេសផ្នែកសិទ្ធិមនុស្ស ប្រចាំនៅព្រះរាជាណាចក្រកម្ពុជា ជំនួសលោកស្រី រ៉ូណាស្មីត ដែលត្រូវផុតអាណត្តិ។ លោក វិទិត មុនតាប៊ន គឺជាជនជាតិថៃ ជាមនុស្សដែលលេចធ្លោ មានឈ្មោះល្បីធ្លាប់ឆ្លងកាត់បទពិសោធន៍ការងារផ្នែកច្បាប់ និង សិទ្ធិមនុស្សអន្តរជាតិជាច្រើននៅលើឆាកអន្តរជាតិ៕ អត្ថបទ៖ មុត សុទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
