ប្រធានាធិបតីអ៊ុយក្រែន លោក Volodymyr Zelensky កាលពីថ្ងៃព្រហស្បតិ៍ (ទី១២ ខែកញ្ញា) បាននិយាយថា រូបលោក និងអគ្គរដ្ឋអាជ្ញានៃតុលាការឧក្រិដ្ឋកម្មអន្តរជាតិ (ICC) គឺលោក Karim Khan បានពិភាក្សាគ្នាអំពីរបៀបថា តើត្រូវធ្វើដូចម្ដេច ដើម្បីធានាថា ដីកាចាប់ខ្លួន ចំពោះមន្ត្រីរុស្ស៊ីដែលត្រូវការខ្លួន ពាក់ព័ន្ធនឹងឧក្រិដ្ឋកម្មសង្គ្រាម នៅប្រទេសអ៊ុយក្រែន ត្រូវបានអនុវត្ត។

តាមរយៈការបង្ហោះនៅលើបណ្ដាញសង្គម X បន្ទាប់ពីអ្នកទាំង ២ បានជួបគ្នា លោក Zelensky បានឲ្យដឹងថា៖ «វាមានសារៈសំខាន់ណាស់ ក្នុងការអនុលោមតាមច្បាប់ទីក្រុងរ៉ូម (Rome Statute) និងធានាថា ការសម្រេចរបស់តុលាការលើដីកាចាប់ខ្លួន ចំពោះឧក្រិដ្ឋជនសង្គ្រាមរុស្ស៊ី មិនត្រូវបានធ្វើមិនដឹងមិនឮ»។

គួរបញ្ជាក់ថា ICC បានចេញដីកាចាប់ខ្លួនមន្ត្រីរុស្ស៊ីជាច្រើនរូប ក្នុងនោះរួមទាំងប្រធានាធិបតី លោក Vladimir Putin ពីបទនិរទេសកុមារដោយខុសច្បាប់ ក្នុងអំឡុងសង្រ្គាម។ ដីកាលើហេតុផលដូចគ្នា ត្រូវបានចេញ សម្រាប់លោកស្រី Maria Lvova-Belova ដែលជាស្នងការរុស្ស៊ីទទួលបន្ទុកសិទ្ធិកុមារ។

ក៏មានឈ្មោះក្នុងដីកានេះផងដែរ គឺលោក Sergei Shoigu ប្រធានក្រុមប្រឹក្សាសន្តិសុខរុស្ស៊ី ហើយនិងលោក Viktor Sokolov និងលោក Sergey Kobylash ដែលត្រូវបានចោទប្រកាន់ពីបទដឹកនាំការវាយប្រហារប្រឆាំងនឹងទីតាំងជនស៊ីវិល។ រុស្ស៊ីបានច្រានចោលដីកានេះថា គ្មានន័យ និង «ទុកជាមោឃភាព»។

ជាមួយគ្នានេះដែរ ក្រសួងការបរទេសអ៊ុយក្រែន បាននិយាយថា ខ្លួនបានធ្វើការតវ៉ាការទូតប្រឆាំងនឹងប្រទេសម៉ុងហ្គោលី ពាក់ព័ន្ធនឹងការមិនអនុវត្តដីកាចាប់ខ្លួនរបស់ ICC ចំពោះលោក Putin ក្នុងអំឡុងដំណើរទស្សនកិច្ចរបស់ប្រធានាធិបតីរុស្ស៊ីរូបនេះទៅកាន់ប្រទេសនេះ កាលពីសប្តាហ៍មុន៕