ក្រុមមន្ត្រីបាននិយាយថា សមាជិកចំនួនប្រាំពីរនាក់នៃគ្រួសារមួយ បានស្លាប់ និងពីរនាក់ផ្សេងទៀតត្រូវបានជួយសង្គ្រោះ ចេញពីកម្ទេចកម្ទីបាក់បែក កាលពីថ្ងៃព្រហស្បតិ៍ បន្ទាប់ពីជញ្ជាំង បានបាក់រលំលើលំនៅឋាន នៅក្នុងរដ្ឋMadhya Pradesh ប្រទេសឥណ្ឌាភាគកណ្តាល។

ជញ្ជាំង បានបាក់រលំនៅក្នុងតំបន់ Khalkapura នៃស្រុក Datia មានចម្ងាយប្រហែល៤០០គីឡូម៉ែត្រភាគខាងជើងទីក្រុង Bhopal រដ្ឋធានីនៃរដ្ឋ Madhya Pradesh ។

មន្ត្រីជាន់ខ្ពស់រដ្ឋាភិបាលក្នុងតំបន់ លោក Sandeep Makin បាននិយាយថា ឧបទ្ទវហេតុនេះបានកើតឡើងខណៈជញ្ជាំង Rajgarh Fort ដែលមានអាយុ កាល ៤០០ឆ្នាំ បានបាក់រលំ។

ក្រុមមន្ត្រី បាននិយាយថា ជញ្ជាំងមានផ្ទាំងធំៗជាច្រើន។ វា បានបាក់រលំដោយសារតែភ្លៀងធ្លាក់ខ្លាំង ពីរថ្ងៃមកនេះ ដែលបានធ្វើឱ្យរចនាសម្ព័ន្ធរបស់ជញ្ជាំង ចុះខ្សោយ។