ប្រធានាធិបតីរុស្ស៊ីលោក Vladimir Putin និយាយថា លោកខាងលិចនឹងធ្វើសង្រ្គាមដោយផ្ទាល់ជាមួយរុស្ស៊ី បើសិនពួកគេអនុញ្ញាតឲ្យអ៊ុយក្រែនវាយប្រហារទឹកដីរុស្ស៊ីដោយប្រើប្រាស់មីស៊ីលរយៈចម្ងាយឆ្ងាយផលិតនៅលោកខាងលិច គឺជាជំហានមួយដែលលោកនិយាយថា វានឹងផ្លាស់ប្តូរលក្ខណៈ និងវិសាលភាពនៃសង្រ្គាម ។

គួរឲ្យដឹងថា ប្រធានាធិបតីអ៊ុយក្រែន លោក Volodymyr Zelenskiy បានលុនតួអង្វរក.សម្ព័ន្ធមិត្តទីក្រុងគីវ អស់រយៈពេលជាច្រើនខែមកហើយ ដើម្បីអនុញ្ញាតឲ្យបាញ់មីស៊ីលលោកខាងលិច រួមទាំងមីស៊ីលរយៈចម្ងាយឆ្ងាយ ATACMS របស់សហរដ្ឋអាមេរិក និងមីស៊ីល Storm Shadows របស់អង់គ្លេស ចូលទៅក្នុងទឹកដីរុស្ស៊ី ដើម្បីកម្រិតសមត្ថភាពរបស់ទីក្រុងម៉ូស្គូ ក្នុងការវាយប្រហាររបស់ពួកគេ ។

នៅក្នុងសេចក្តីអត្ថាធិប្បាយដ៏អសុរោះបំផុតរបស់លោកនេះដែរ លោក Putin និយាយថា ចំណាត់ការបែបនេះ នឹងអូសទាញប្រទេសផ្គត់ផ្គង់មីស៊ីលរយៈចម្ងាយឆ្ងាយដល់ទីក្រុងគីវ ឲ្យចូលធ្វើសង្រ្គាមដោយផ្ទាល់ ដោយហេតុថាផ្កាយរណបចាប់ទិន្នន័យ និងកម្មវិធីពិតប្រាកដផ្លូវហោះរបស់មីស៊ីល នឹងត្រូវធ្វើឡើងដោយមន្រ្តីយោធាអង្គការណាតូ ពីព្រោះថា ទីក្រុងគូវ គ្មានសមត្ថភាពខ្លួនឯងនោះទេ ។

លោក Putinនិយាយប្រាប់ទូរទស្សន៍រដ្ឋរុស្ស៊ីថា ដូច្នេះហើយ នេះមិនមែនជាសំនួរ ថាត្រូវអនុញ្ញាតឲ្យរបបអ៊ុយក្រែន វាយប្រហាររុស្ស៊ី ជាមួយអាវុធទាំងនេះ ឬមិនត្រូវអនុញ្ញាតនោះទេ ។ វាជាសំនួរពីការសម្រេចចិត្តថាតើ ឬមិនតើប្រទេសសម្ព័ន្ធមិត្តណាតូ ត្រូវពាក់ព័ន្ធដោយផ្ទាល់នៅក្នុងជម្លោះយោធានេះឬយ៉ាងណា ។

លោកនិយាយទៀតថា បើសិនជាការសម្រេចចិត្តនេះ ធ្វើឡើង វាគ្មានន័យអ្វីក្រៅពីការជាប់ពាក់ព័ន្ធដោយផ្ទាល់របស់ប្រទេសសមាជិកអង្គការណាតូ សហរដ្ឋអាមេរិក និងប្រទេសនៅអឺរ៉ុប នៅក្នុងសង្រ្គាមអ៊ុយក្រែន ។ នេះនឹងក្លាយជាការចូលរួមដោយផ្ទាល់របស់ពួកគេ ហើយពិតណាស់ថា នេះនឹងផ្លាស់ប្តូរទាំងស្រុងលក្ខណៈ និងវិសាលភាពនៃសង្រ្គាមមួយនេះ ៕