នៅថ្ងៃសុក្រនេះ ក្រុមគ្រួសារ និងក្រុមអ្នកគាំទ្រចំណាប់ថ្នូរដែលនៅជាប់ខ្លួនក្នុងតំបន់ហ្កាហ្សា នាំគ្នាបិទស្ពាននៅកណ្តាលទីក្រុងតែល អាវីវ ទាមទារឲ្យរដ្ឋាភិបាលអ៊ីស្រាអែល ធ្វើរឿងបន្ថែមទៀត ដើម្បីទទួលបានកិច្ចព្រមព្រៀងដោះលែងមនុស្សជាទីស្រលាញ់របស់ពួកគេ ។

កិច្ចខិតខំទទួលបានបទឈប់បាញ់នៅតំបន់ហ្កាហ្សា ដែលរួមបញ្ចូលកិច្ចព្រមព្រៀងដោះលែងចំណាប់ថ្នូ បានជាប់គាំង ។

អ៊ីស្រាអែល និងក្រុមហាម៉ាស់ បានដាក់ការស្តីបន្ទោសលើគ្នាទៅវិញទៅមក សម្រាប់ភាពទាល់ច្រកនេះ ។ បាតុកម្មទ្រង់ទ្រាយធំ កាលពីសប្តាហ៍មុន បានទាមទារឲ្យក្រុមមេដឹកនាំអ៊ីស្រាអែល ធ្វើរឿងបន្ថែមទៀត សម្រាប់ការដោះលែងចំណាប់ថ្នូរ ប៉ុន្តែក្រុមគ្រួសារ បានធ្វើបាតុកម្មទ្រង់ទ្រាយតូច ស្ទើតែរាល់ថ្ងៃ ។

នៅថ្ងៃសុក្រនេះ ក្រុមបាតុករនាំគ្នារុំច្រវ៉ាក់លើដងខ្លួន និងឈរជាជួរ បិទស្ពានមិនឲ្យធ្វើដំណើរឆ្លងកាត់ ក៏ដូចជាដុតភ្លើងក្នុងធុងសាំង ។

លោក Zahiro Shahar Mor គឺជាបាតុករវ័យ ៥២ឆ្នាំមួយរូប បាននិយាយរៀបរាប់ថា សកម្មភាពនេះ គឺជាការផ្ទុះកំហឹងដោយឯកឯង ហើយលោកបានជំរុញឲ្យរដ្ឋាភិបាលអ៊ីស្រាអែល ចុះហត្ថលេខាលើកិច្ចព្រមព្រៀងឲ្យបានឆាប់រហ័សតាមដែលអាចធ្វើទៅបាន ។ 

គួរឲ្យដឹងថា ក្រុមសកម្មប្រយុទ្ធដឹកនាំដោយក្រុមជីវពលហាម៉ាស់ បានចាប់ចំណាប់ថ្នូរជាជនបរទេស និងជនជាតិអ៊ីស្រាអែលប្រហែល ២៥០នាក់ ពេលដែលពួកគេវាយឆ្មក់តំបន់ភាគខាងត្បូងប្រទេសអ៊ីស្រាអែលកាលពីថ្ងៃទី ៧ ខែតុលា ឆ្នាំ ២០២៣ និងបានសម្លាប់មនុស្សជាង ១.២០០នាក់ ។ ចំណែកឯការវាយប្រហារតំបន់ហ្កាហ្សារបស់អ៊ីស្រាអែល បានសម្លាប់ជនប៉ាឡេស្ទីនជាង ៤ម៉ឺននាក់ ចាប់តាំងពីពេលនោះមក ។

ចំណាប់ថ្នូរប្រហែល ១០០នាក់ បន្តនៅជាប់ខ្លួននៅតំបន់ហ្កាហ្សា ក្នុងនោះ ១ភាគ ៣នៃពួកគេ ត្រូវបានគេជឿថាស្លាប់ ។ ចំណាប់ថ្នូរជាង ១០០នាក់ ត្រូវបានដោះលែងជាការដោះដូរនឹងអ្នកទោសប៉ាឡេស្ទីន កាលពីខែវិច្ឆិកា ឆ្នាំ ២០២៣ ហើយចំណាប់ថ្នូរ ៨នាក់ ត្រូវបានជួយសង្រ្គោះដោយកងកម្លាំងអ៊ីស្រាអែល ៕