បន្ទាយមានជ័យ៖ គណៈកម្មាធិការជាតិគ្រប់គ្រងគ្រោះមហន្តរាយ បានជូនដំណឹងតាមបណ្ដាញតេឡេក្រាមនៅយប់នេះថា ទឹកនៅក្នុងខេត្តស្រះកែវ ប្រទេសថៃ កំពុងហក់ឡើងខ្លាំង ហើយគំរាមកំហែងដល់ទីក្រុងប៉ោយប៉ែត ដែលស្ថិតនៅជាប់ព្រំដែនកម្ពុជា-ថៃ។
គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងផងដែរថា ប្រជាពលរដ្ឋចំនួន ៩៧គ្រួសារហើយនៅក្រុងប៉ោយប៉ែត ត្រូវបានជម្លៀសចេញទៅកាន់ទីទួលសុវត្ថិភាព។
ចំណែកទឹកស្ទឹងមង្គលបូរីវិញ ក៏បានហក់ឡើងជិតដល់កម្រិតប្រកាសអាសន្នហើយ ហើយទឹកស្ទឹងសិរីសោភ័ណ បានជន់លិចបណ្ដាលឱ្យប៉ះពាល់ប្រជាជនមួយចំនួននៅតាមដងស្ទឹងផងដែរ។
រីឯនៅភូមិបឹងជង្រុក (តំបន់អភិវឌ្ឍន៍បឹងជង្រុក តេជោឈ្នះឈ្នះ) ឃុំពង្រ ស្រុកម៉ាឡៃ ទឹកបានលិចផ្ទះប្រជាជនប្រមាណ ៨៧៣ខ្នង ដោយក្រុមការងារនិងកងកម្លាំងប្រដាប់អាវុធ បានរៀបចំទីទួលសុវត្ថិភាពរួចជាស្រេច និងត្រៀមជម្លៀសប្រជាជន។
គណៈកម្មាធិការជាតិគ្រប់គ្រងគ្រោះមហន្តរាយ ជូនដំណឹងអំពីស្ថានភាពទឹកជំនន់ខេត្តបន្ទាយមានជ័យបែបនេះ បន្ទាប់ពីទទួលបានព័ត៌មានពីអភិបាលខេត្តបន្ទាយមានជ័យ ដែលបញ្ជាក់ថា ទឹកនៅស្រុកអរញ្ញ ខេត្តស្រះកែវ ប្រទេសថៃ កំពុងហក់ឡើងខ្លាំងអាចនឹងហូរមកខេត្តបន្ទាយមានជ័យឆាប់ៗ។ នៅក្រុងប៉ោយប៉ែតបានជម្លៀសប្រជាពលរដ្ឋចំនួន ៩៧គ្រួសារ មកកាន់ទីទួលសុវត្ថិភាព។
ឯកឧត្តម នាយឧត្តមសេនីយ៍បណ្ឌិត ទេសរដ្ឋមន្ត្រី គន់ គីម បានចល័តពីខេត្តពោធិ៍សាត់ បាត់ដំបង និងឥឡូវនេះ កំពុងប្រចាំការនៅខេត្តបន្ទាយមានជ័យ ដើម្បីតាមដានត្រួតពិនិត្យ និងដឹកនាំបញ្ជាកងកម្លាំង ត្រៀមសង្គ្រោះប្រជាពលរដ្ឋ ក្នុងករណីមានគ្រោះមហន្តរាយកើតឡើង៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
