ក្រសួងការពារជាតិរុស្ស៊ី បាននិយាយនៅថ្ងៃសុក្រនេះថា នាវាមកពីកងនាវា Northern Fleet របស់រុស្ស៊ី បានបាញ់មីស៊ីលតម្រង់គោលដៅលើគោលដៅជាច្រើននៅក្នុងសមុទ្រ Barents ដែលជាផ្នែកមួយនៃសមយុទ្ធកងទ័ពជើងទឹកមហាសមុទ្រឆ្នាំ ២០២៤ ។

ពួកគេនិយាយថា ការវាយប្រហារនេះ ត្រូវបានធ្វើឡើងដោយប្រើប្រាស់មីស៊ីលប្រឆាំងនាវា Vulkan និង Oniks រយៈចម្ងាយ ២០០គ.ម និងរយៈចម្ងាយ ១៨០គ.ម ។

ក្រសួងការពារជាតិរុស្ស៊ី បានបញ្ជាក់ថា គោលដៅបានបាញ់ត្រូវទាំងអស់ ។

គួរឲ្យដឹងថា កាលពីដើមសប្តាហ៍នេះ រុស្ស៊ី បានចាប់ផ្តើមសមយុទ្ធយុទ្ធសាស្រ្តនៅមហាសមុទ្រប៉ាស៊ីហ្វិក និងមហាសមុទ្រអាក់ទិក ក៏ដូចជានៅសមុទ្រមេឌីទែរ៉ាណេ បាល់ទិក និងសមុទ្រកាសព្យែន ដែលជាជាផ្នែកមួយនៃការល្បាតរួមគ្នាជាមួយកងនាវាចិន នៅសមុទ្រជប៉ុន ។

ពួកគេ បាននិយាយនៅក្នុងសេចក្តីថ្លែងការណ៍ថា សមយុទ្ធនេះ ជាប់ពាក់ព័ន្ធនឹងនាវា និងនាវាមុជទឹកជាង ៤០០គ្រឿង ហើយនិងកងកម្លាំង ៩ម៉ឺននាក់ ។

ដោយឡែក កាលពីខែកក្កដាកន្លងទៅ ចិន និងរុស្ស៊ី បានធ្វើសមយុទ្ធកងទ័ពជើងទឹករួមគ្នានៅជិតទីក្រុង Zhanjianស្ថិតនៅភាគខាងត្បូងប្រទេសចិន និងបានល្បាតរួមគ្នដាច់ដោយឡែកមួយទៀត នៅក្នុងមហាសមុទ្រប៉ាស៊ីហ្វិក ក្នុងខែកក្កដានោះ ៕