ភ្លើងឆេះព្រៃនៅតែបន្តឆាបឆេះនៅជួរភ្នំ Pyrenees ស្ថិតនៅភាគនិរតីប្រទេសបារាំងនាថ្ងៃសុក្រនេះ បើទោះបីជាក្រុមអាជ្ញាធរ និយាយថា បច្ចប្បន្នវាត្រូវបានគ្រប់គ្រងក៏ដោយ ក្រោយពេលឆាបឆេះខ្លាំងកាលពីរយៈពេល ១ថ្ងៃមុន ។

ក្រុមអាជ្ញាធរ និយាយថា ភ្លើងឆេះព្រៃនេះ បានឆាបឆេះឡើងកាលពីរសៀលថ្ងៃព្រហស្បតិ៍ បង្ខំឲ្យមានការជម្លៀសអ្នកភូមិប្រហែល ៨០នាក់ ចេញពីផ្ទះសម្បែងរបស់ពួកគេ ស្ថិតនៅចម្ងាយប្រហែល ៣០គ.ម ភាគនិរតីទីក្រុង Perpignan ។

នាយកដ្ឋានពន្លត់អគ្គិភ័យក្នុងស្រុក និយាយនៅក្នុងសេចក្តីថ្លែងការណ៍នាព្រឹកថ្ងៃសុក្រនេះថា ភ្លើងឆេះព្រៃ បានរីករាលដាលលើផ្ទៃដី ៤០០ហិចតា នៅជួរភ្នំ Pyrenees-Orientales ។

ក្រុមភ្នាក់ងារពន្លត់អគ្គិភ័យ ៥នាក់ បានរងរបួសស្រាល ហើយពួកគេ ២នាក់ ត្រូវបានបញ្ជូនទៅកាន់មន្ទីរពេទ្យ ខណៈដែលផ្ទះមួយខ្នង រងការខូចខាត ។

ក្រុមភ្នាក់ងារពន្លត់អគ្គិភ័យរាប់រយនាក់ និងឧទ្ធម្ភាគចក្រ ៣គ្រឿង បានចុះប្រតិបត្តិការពន្លត់ភ្លើងឆេះព្រៃ នៅព្រឹកថ្ងៃសុក្រនេះ ។

ក្រុមអាជ្ញាធរ និយាយថា ក្រុមភ្នាក់ងារពន្លត់អគ្គិភ័យសរុប ៨០០នាក់ យន្តហោះពន្លត់អគ្គិភ័យ ៩គ្រឿង និងឧទ្ធម្ភាគចក្រ ៣គ្រឿង ត្រូវបានដាក់ពង្រាយ ដើម្បីពន្លត់ភ្លើងឆេះព្រៃនៅតាមតំបន់ភ្នំខ្ពស់ៗ កាលពីថ្ងៃព្រហស្បតិ៍ម្សិលមិញ ៕