រដ្ឋាភិបាលវេណេស៊ុយអេឡា បានកោះហៅឯកអគ្គរដ្ឋទូតរបស់ខ្លួន ប្រចាំនៅប្រទេសអេស្ប៉ាញទ្រឡប់ទៅប្រទេសវិញ ដើម្បីពិគ្រោះយោបល់ ហើយបានកោះអញ្ជើញឯកអគ្គរដ្ឋទូតអេស្ប៉ាញឲ្យបង្ហាញខ្លួន នៅក្រសួងការបរទេស ដោយការធ្វើបែបនេះបានបង្កើនភាពតានតឹងផ្នែកការទូតរឹតតែខ្លាំងឡើង បន្ទាប់ពីមាននូវការបោះឆ្នោតប្រធានាធិបតីដ៏ចម្រូងចម្រាស។

ដោយលើកឡើងពី «ការអត្ថាធិប្បាយមិនគោរព អន្តរាគមន៍និយម និងអសីលធម៌» របស់រដ្ឋមន្ត្រីការពារជាតិអេស្ប៉ាញ លោកស្រី Margarita Robles តាមរយៈការបង្ហោះរបស់លោក នៅលើវេទិកាផ្ញើសារ Telegram រដ្ឋមន្ត្រីការបរទេសវេណេស៊ុយអេឡា លោក Yvan Gil បានឲ្យដឹងថា ទាំងនេះជាហេតុផលនៅពីក្រោយចំណាត់ការនេះ។

គួរបញ្ជាក់ថា កាលពីថ្ងៃព្រហស្បតិ៍ (ទី១២ ខែកញ្ញា) ក្នុងអំឡុងពេលនៃការធ្វើបទបង្ហាញសៀវភៅ នៅទីក្រុងម៉ាឌ្រីដ លោកស្រី Robles បានសំដៅទៅលើរដ្ឋបាលរបស់ប្រធានាធិបតី លោក Nicolas Maduro ថា ជា «របបផ្តាច់ការ» ដោយបានបង្ហាញសមានចិត្តអាណិតអាសូរដល់ប្រជាជនវេណេស៊ុយអេឡា ដែលត្រូវចាកចេញពីប្រទេសដោយសារតែរបបនេះ។

លោក Gil បាននិយាយថា លោកបានកោះហៅលោកស្រី Gladys Gutierrez ឯកអគ្គរដ្ឋទូតប្រចានៅប្រទេសអេស្ប៉ាញ ឲ្យត្រឡប់មកកាន់ប្រទេសវេណេស៊ុយអេឡា ដើម្បីពិគ្រោះយោបល់ ខណៈដែលក្នុងពេលជាមួយគ្នានោះ លោកបានកោះអញ្ជើញឯកអគ្គរដ្ឋទូតអេស្ប៉ាញ ប្រចាំនៅវេណេស៊ុយអេឡា លោក Ramon Santos ឲ្យបង្ហាញខ្លួន នៅក្រសួងរបស់លោក នាថ្ងៃសុក្រនេះ។

កាលពីថ្ងៃព្រហស្បតិ៍ នាយករដ្ឋមន្ត្រីអេស្ប៉ាញ លោក Pedro Sanchez បានជួបជាមួយមេដឹកនាំគណបក្សប្រឆាំងដែលនិរទេសខ្លួនដោយខ្លួនឯងរបស់វេណេស៊ុយអេឡា គឺលោក Edmundo Gonzalez ក្នុងទីក្រុងម៉ាឌ្រីដ មួយថ្ងៃបន្ទាប់ពីសភាជាន់ទាបនៃសភារបស់ប្រទេសអេស្ប៉ាញ បានបោះឆ្នោតទទួលស្គាល់លោក Gonzalez ថា ជាអ្នកឈ្នះការបោះឆ្នោតប្រធានាធិបតីដែលពេញទៅដោយភាពចម្រូងចម្រាសនោះ។

គណបក្សប្រឆាំងវេណេស៊ុយអេឡាបានចេញផ្សាយចំនួនសន្លឹកឆ្នោតលម្អិតដែលចង្អុលបង្ហាញពីជ័យជម្នះដ៏ធំធែងសម្រាប់លោក Gonzalez។ ប៉ុន្តែអាជ្ញាធររៀបចំការបោះឆ្នោតជាតិ ដែលមិនបានចេញផ្សាយចំនួនសន្លឹកឆ្នោតលម្អិត បានប្រកាសថា ប្រធានាធិបតីកំពុងកាន់អំណាចលោក Nicolas Maduro ជាអ្នកឈ្នះ៕