ប្រទេសអឺរ៉ុបចំនួន៩ នៅថ្ងៃសុក្រ (ទី១៣ ខែកញ្ញា) នេះ បានតវ៉ាប្រឆាំងនឹងមូលនិធិរូបិយវត្ថុអន្តរជាតិ (IMF) ដែលគ្រោងនឹងចាប់ផ្ដើមបេសកកម្មឡើងវិញនៅប្រទេសរុស្ស៊ី ដោយនិយាយថា ការធ្វើបែបនោះនឹងនាំឲ្យខូចកេរ្តិ៍ឈ្មោះរបស់ IMF ក្នុងការចាប់ផ្ដើមការសន្ទនាជាមួយប្រទេស ដែលបានលុកលុយប្រទេសមួយផ្សេងទៀត។

បន្ទាប់ពីមានការលុកលុយរបស់ទីក្រុងមូស្គូលើអ៊ុយក្រែន ក្នុងខែកុម្ភៈ ឆ្នាំ២០២២ មូលនិធិរូបិយវត្ថុអន្តរជាតិ IMF បានបញ្ឈប់ការពិគ្រោះប្រចាំឆ្នាំរបស់ខ្លួនជាមួយរុស្ស៊ី ដែលស្ថាប័នផ្តល់ប្រាក់កម្ចីមានមូលដ្ឋាននៅទីក្រុងវ៉ាស៊ីនតោនមួយនេះ តែងធ្វើជាមួយសមាជិកទាំងអស់របស់ខ្លួន។

ប៉ុន្តែនៅថ្ងៃទី២ ខែកញ្ញា នាយកប្រតិបត្តិរុស្ស៊ីរបស់ IMF លោក Aleksei Mozhin បានប្រាប់សារព័ត៌មាន Reuters ថា IMF នឹងចាប់ផ្តើមឡើងវិញនូវការពិគ្រោះយោបល់តាមប្រព័ន្ធអ៊ីនធឺណិត នៅថ្ងៃទី១៦ ខែកញ្ញា ហើយបន្តដោយគណៈប្រតិភូ IMF ធ្វើដំណើរទស្សនកិច្ចទៅកាន់ទីក្រុងមូស្គូ ដើម្បីជួបជាមួយមន្ត្រីរុស្ស៊ី រហូតដល់ថ្ងៃទី១ ខែតុលា។

នៅក្នុងលិខិតផ្ញើទៅកាន់ប្រធាន IMF គឺលោកស្រី Kristalina Georgieva ដែលត្រូវបានឃើញដោយសារព័ត៌មាន Reuters រដ្ឋមន្ត្រីហិរញ្ញវត្ថុនៃប្រទេសលីទុយអានី ឡាតវី អេស្តូនី ហ្វាំងឡង់ ស៊ុយអែត អ៊ីស្លង់ ដាណឺម៉ាក ន័រវ៉ែស និងប៉ូឡូញ បានលើកឡើងថា៖ «យើងទាំងអស់គ្នា ចង់បង្ហាញពីការមិនពេញចិត្តយ៉ាងខ្លាំងរបស់យើង ចំពោះផែនការែបនេះរបស់ IMF»។

មន្ត្រីសហភាពអឺរ៉ុប បាននិយាយថា លោកស្រី Georgieva កំពុងចូលរួមកិច្ចប្រជុំរដ្ឋមន្ត្រីហិរញ្ញវត្ថុសហភាពអឺរ៉ុប និងធនាគារកណ្តាល នៅទីក្រុង Budapest ប្រទេសហុងគ្រី ហើយពួកគេនឹងសួរលោកស្រីអំពីផែនការរបស់ IMF នៅទីនោះ។ មន្ត្រីជាន់ខ្ពស់ម្នាក់នៃតំបន់ចាយប្រាក់អឺរ៉ូ បានចោទសួរថា៖ «តើអនុសាសន៍អ្វីខ្លះ ដែល IMF ចង់ផ្តល់ឲ្យរុស្ស៊ី នៅពេលបញ្ចប់ការពិគ្រោះយោបល់នោះ? តើធ្វើដូចម្តេចទើបអាចដំណើរការសេដ្ឋកិច្ចសង្គ្រាម បានប្រសើរជាងមុនមែនទេ?»។

លិខិតនោះបានសង្កត់ធ្ងន់ថា ក្នុងនាមជាប្រទេសលុកលុយប្រទេសដទៃ រុស្ស៊ីមិនគួរទទួលបានអត្ថប្រយោជន៍ពីដំបូន្មានរបស់ IMF នោះឡើយ៕