ប្រជាពលរដ្ឋរស់នៅតាមដងទន្លេមេគង្គ ស្ថិតក្នុងទីក្រុងវៀងច័ន្ទន៍ ប្រទេសឡាវ នៅថ្ងៃសុក្រនេះ ទទួលបានការប្រកាសអាសន្នពីក្រុមអាជ្ញាធរ ពាក់ព័ន្ធនឹងកម្រិតទឹកឡើង ហើយនិងការជន់លិចនៅតាមតំបន់វាលទំនៀប ។

ការិយាល័យរដ្ឋបាលក្រុងវៀងច័ន្ទន៍ បាននិយាយនៅក្នុងការប្រកាសអាសន្នរបស់ខ្លួនដែលបានចេញកាលពីថ្ងៃព្រហស្បតិ៍ថា ភ្លៀងធ្លាក់បន្តឥតឈប់ ត្រូវបានគេរំពឹងថានឹងមានចាប់ពីថ្ងៃទី ១២ រហូតដល់ថ្ងៃទី ១៦ ខែកញ្ញា ហើយត្រូវបានគេរំពឹងថា នឹងបណ្តាលឲ្យកម្រិតទឹកទន្លេមេគង្គឡើងភ្លាមៗ ។

គណកម្មការទន្លេមេគង្គ(MRC) និយាយនៅថ្ងៃសុក្រនេះថា កម្រិតទឹកនៅក្នុងខេត្ត Luang Prabang ស្ថិតនៅកម្ពស់ ១ម៉ែត្រពីលើកម្រិតទឹកជំនន់ ហើយវានឹងរាលដាលដល់តំបន់រងផលប៉ះពាល់ស្រាប់នៅខេត្ត Nong Khai ប្រទេសថៃ ។

MRC បានព្យាករណ៍ថា កម្រិតទឹកជំនន់ នឹងឡើងដល់កម្រិតកំពូលនៅថ្ងៃទី ១៦ ខែកញ្ញា មុនពេលវាស្រកមកនៅកម្រិតធម្មតាវិញនៅថ្ងៃទី ១៧ ខែកញ្ញា ៕