រដ្ឋមន្ត្រីការពារជាតិកាណាដា លោក Bill Blair បាននិយាយថា ប្រទេសរបស់លោកកំពុងពិភាក្សាអំពីការចូលរួម ក្នុងកិច្ចព្រមព្រៀង Aukus រវាងសហរដ្ឋអាមេរិក អង់គ្លេស និងអូស្ត្រាលី ដែលត្រូវបានបង្កើតឡើង ដើម្បីប្រឆាំងនឹងការកើនឡើងនូវឥទ្ធិពលយោធារបស់ចិន នៅក្នុងតំបន់អាស៊ី-ប៉ាស៊ីហ្វិក។

កាណាដាបាននិយាយថា ខ្លួនចង់ចូលរួមជាមួយសសរស្តម្ភទី២ របស់ Aukus ដែលនឹងសហការលើបច្ចេកវិទ្យាយោធាថ្មី ក្នុងរួមទាំងបញ្ញាសិប្បនិម្មិត (AI) និងកុំព្យូទ័រ Quantum ផងដែរ ប៉ុន្តែរហូតមកដល់ពេលនេះ មិនទាន់បានបង្ហាញពីព័ត៌មានលម្អិតនៃកិច្ចពិភាក្សាទាំងនោះនៅឡើយទេ។

នៅក្នុងបទសម្ភាសន៍មួយ នាទីក្រុងតូក្យូ ជាកន្លែងដែលលោកបានជួបសមភាគីជប៉ុនរបស់លោក គឺលោក Minoru Kihara លោក Blair បាននិយាយថា៖ «មានការពិភាក្សាសំខាន់ៗ អំពីដំណើរការ និងវេទិកា ស្ដីអំពីមូលដ្ឋានជាក់លាក់នៃគម្រោង ដែលប្រទេសផ្សេងទៀត ក្នុងនោះរួមទាំងប្រទេសជប៉ុន និងខ្លួនយើងផ្ទាល់ អាចចូលរួមបាន»។

លោក Blair បានប្រាប់ថា លោក និងលោក Kihara បានពិភាក្សាជាមួយ Aukus ដែលកំពុងពិចារណាធ្វើការជាមួយប្រទេសជប៉ុនរួចហើយ។ ដំណាក់កាលដំបូងរបស់ Aukus ពាក់ព័ន្ធនឹងសមាជិកស្ថាបនិកទាំង៣ ដែលកំពុងធ្វើការលើបច្ចេកវិទ្យានាវាមុជទឹកដើរដោយថាមពលនុយក្លេអ៊ែរ សម្រាប់ប្រទេសអូស្ត្រាលី។

លោក Blair ដែលកំពុងធ្វើដំណើរទៅប្រទេសជប៉ុនជាលើកទី២ ក្នុងនាមជារដ្ឋមន្ត្រីការពារជាតិ បានទៅដល់ទីក្រុងតូក្យូ ដោយចាកចេញពីកូរ៉េខាងត្បូងដែលក៏កំពុងពិភាក្សាផងដែរអំពីតួនាទី នៅក្នុងសម្ព័ន្ធ Aukus៕