រយៈពេលជាច្រើនថ្ងៃ ក្រោយទឹកជំនន់វាយប្រហារទីក្រុងភាគឦសាន Maiduguriប្រទេសនីហ៊្សេរីយ៉ា ក្រុមឆ្លើយតបសង្រ្គោះបន្ទាន់ បានព្យាយាមទៅដល់អ្នករស់រានជាប់ខ្លួនក្នុងទឹកជំនន់ ខណៈដែលគ្រួសារមានទុក្ខព្រួយ ព្យាយាមស្វែងរកមនុស្សជាទីស្រលាញ់របស់ពួកគេដោយខ្លួនឯង និងសង្ឃឹមថានឹងអាចជួបជុំគ្នាវិញជាមួយសមាជិកគ្រួសារបាត់ខ្លួនរបស់ពួកគេ ។

ទឹកជំនន់ បានចាប់ផ្តើមកើតមាន ពេលទំនប់ទឹកហូរប្រៀបច្រាំង បានបាក់ ដោយសារភ្លៀងធ្លាក់ខ្លាំង ហូរនាំយកទៅផ្ទះសម្បែងប្រជាពលរដ្ឋជាច្រើន និងសួនសត្វ ។

អ្នកស្រី Aisha Muhammed ត្រូវបានជួយសង្រ្គោះដោយទាហានដែលបានជួយគ្រួសាររបស់គាត់ផងដែរ ទៅកាន់ទីទួលសុវត្ថិភាព តែដោយឡែក កូនប្រុសអាយុ ៨ឆ្នាំរបស់គាត់ បានបាត់ខ្លួន ហើយមិនបានឃើញកូនអស់រយៈពេល ៣ថ្ងៃមកហើយ ។

ពេលវិលត្រឡប់មកកាន់ទីទួលវិញ ក្រោយបញ្ចប់ការដើររកកូនប្រុសរបស់គាត់ម្តងទៀត អ្នកស្រី Aisha និយាយប្រាប់ទីភ្នាក់ងារព័ត៌មានរ៉យទ័រថា ឥឡូវពួកយើងនៅដើររកកូនប្រុសរបស់ខ្ញុំ ។ ពួកយើងបួងសួងដល់ព្រះឲ្យជួយពួកយើងក្នុងស្ថានភាពអាក្រក់បែបនេះ ។

ជំរំនៅទីក្រុងភាគឦសាន Maiduguri ប្រទេសនីហ៊្សេរីយ៉ា ធ្លាប់ជាកន្លែងជ្រកកោនសម្រាប់មនុស្សរាប់ម៉ឺននាក់ ដែលបានជម្លៀសខ្លួនពីការបះបោររបស់ក្រុមឧទ្ទាម Boko Haramប៉ុន្តែឥឡូវ វាបានបើកឡើងវិញ ដើម្បីផ្តល់ជាទីជម្រកដល់មនុស្សដែលជម្លៀសខ្លួនពីទឹកជំនន់ ។

មនុស្សជម្លៀសខ្លួនដូចជាអ្នកស្រី Kubura Muhammedមិនទាន់ទទួលបានសំពត់តង់នៅឡើយទេ ប៉ុន្តែអ្វីដែលអ្នកស្រីព្រួយបារម្ភជាងគេបំផុតនោះ គឺលទ្ធភាពនៃការមិនបានជួបប្តីរបស់អ្នកស្រីម្តងទៀត ៕