បេក្ខជនប្រធានាធិបតីគណបក្សសាធារណរដ្ឋ លោក Donald Trump បានសន្យាថានឹងនិរទេសជនអន្តោប្រវេសន៍ហៃទី យ៉ាងច្រើន នៅក្នុងរដ្ឋ Ohio កាលពីថ្ងៃសុក្រ ទី១៣ ខែកញ្ញា ភ្លាមៗបន្ទាប់ពីប្រធានាធិបតីសហរដ្ឋអាមេរិក លោក Joe Biden បានអំពាវនាវសម្រាប់ការវាយប្រហារលើសហគមន៍ ហៃទី ដែលត្រូវតែបញ្ឈប់។

លោក Trump បាននិយាយនៅក្នុងសន្និសីទសារព័ត៌មាននៅរមណីយដ្ឋានកីឡាវាយកូនហ្គោលរបស់លោក ក្នុងទីក្រុង Rancho Palos Verdes ជិតទីក្រុង Los Angeles ថា «យើងនឹងធ្វើការនិរទេសេជនអន្តោប្រវេសន៍ទ្រង់ទ្រាយធំនៅទីក្រុង Springfield រដ្ឋ Ohio»។

ខណៈលោក Trump ដែលមានអាយុ៧៨ ឆ្នាំបានបន្តការវាយប្រហាររបស់លោក លើជនអន្តោប្រវេសន៍ លោកពុំបានពិនិត្យមើលឡើងវិញនូវការនិយាយមិនពិត និងប្រមាថមើលងាយដែលលោក បានធ្វើក្នុងអំឡុងពេលជជែកដេញដោលរបស់លោក កាលពីយប់ថ្ងៃអង្គារជាមួយគូប្រជែងមកពីគណបក្សប្រជាធិបតេយ្យ គឺអនុប្រធានាធិបតីសហរដ្ឋអាមេរិកលោកស្រី Kamala Harris នោះទេ។

ការអត្ថាធិប្បាយទាំងនោះ រួមទាំងបាននិយាយថា សហគមន៍ហៃទី កំពុងទទួលទានសត្វសុនខ និងឆ្មា ដែលបានធ្វើឲ្យមានការស្តីបន្ទោសយ៉ាងខ្លាំងកាលពីថ្ងៃសុក្រ ពីលោក Biden ។

មេដឹកនាំសហគមន៍ហៃទី នៅទូទាំងសហរដ្ឋអាមេរិក បាននិយាយថា ការលើកឡើងរបស់បេក្ខជនមកពីគណបក្សសាធារណរដ្ឋ អាចធ្វើឲ្យជីវិតរបស់ពួកគេប្រឈមហានិភ័យ និងភាពតានតឹងកាន់តែខ្លាំងឡើងនៅក្នុងទីក្រុង Springfield រដ្ឋ Ohio ជាកន្លែងមានអ្នកមកដល់ពីប្រទេសហៃទីថ្មីៗរាប់ពាន់នាក់ដែលបានជំរុញសេដ្ឋកិច្ចក្នុងស្រុក។