ប្រព័ន្ធផ្សព្វផ្សាយក្នុងស្រុកបានរាយការណ៍ កាលពីថ្ងៃសុក្រ ទី១៣ ខែកញ្ញា ថា កូដកម្មរយៈពេល២៤ ម៉ោងធ្វើឡើងដោយបុគ្គលិកអាកាសចរណ៍ នៅក្នុងប្រទេសអាហ្សង់ទីន ជុំវិញជម្លោះប្រាក់ខែជាមួយរដ្ឋាភិបាលបានបណ្តាលឱ្យមានការលុបចោលជើងហោះហើរចំនួន៣១៩ជើង ដែលបានប៉ះពាល់ដល់អ្នកដំណើរជាង ៣៧.០០០នាក់ ។

កូដកម្ម បានចាប់ផ្តើមកាលពីថ្ងៃសុក្រ ហើយបានបណ្តាលឱ្យអ្នកដំណើររាប់ពាន់នាក់ជាប់គាំង និងបានមកតម្រង់ជួរនៅបញ្ជរសេវាអតិថិជននៅអាកាសយានដ្ឋាន Jorge Newbery ក្នុងទីក្រុង Buenos Aires ។

សហជីពនានា ដែលជាកម្លាំងជំរុញនៅពីក្រោយការធ្វើកូដកម្ម បានបន្តការតវ៉ារបស់ពួកគេរហូតដល់ម៉ោង១២ ថ្ងៃត្រង់ នៅថ្ងៃសៅរ៍នេះ។

សហជីព បានទាមទារការដំឡើងប្រាក់ខែឱ្យបានល្អប្រសើរជាមុន ដើម្បីសម្របតាមអត្រាអតិផរណាប្រចាំឆ្នាំ ២៦៤% ជាកម្រិតខ្ពស់បំផុតនៅទូទាំងពិភពលោក។

ប្រធានាធិបតី លោក Javier Milei បានប្រកាសផែនការធ្វើឯកជនភាវូបនីយកម្មក្រុមហ៊ុនអាកាសចរណ៍ Aerolineas Argentinas ដែលគ្រប់គ្រងដោយរដ្ឋ ជាផ្នែកមួយនៃកញ្ចប់កែសម្រួលរបស់លោកដើម្បីដោះស្រាយអតិផរណា និងឱនភាពរបស់រដ្ឋ។