បណ្ដានាយកប្រតិបត្តិនៃឧស្សាហកម្ម និងអ្នកវិភាគ បានលើកឡើងថា កូដកម្មលើកដំបូងរបស់ក្រុមហ៊ុន Boeing ក្នុងរយៈពេល ១៦ឆ្នាំ អាចបង្កើនបន្ថែមទៀតដល់ការខ្វះខាតយន្តហោះដឹកអ្នកដំណើរជាសាកល ដែលបាន និងកំពុងជំរុញឲ្យមានការឡើងថ្លៃសំបុត្រយន្តហោះ និងបង្ខំឲ្យក្រុមហ៊ុនអាកាសចរណ៍បន្តហោះហើរយន្តហោះចាស់ៗរយៈពេលយូរទៀត។

កម្មករនៅតំបន់ West Coast របស់ក្រុមហ៊ុនផលិតយន្តហោះអាមេរិក បានធ្វើកូដកម្ម កាលពីពាក់កណ្តាលអធ្រាត្រថ្ងៃទី១៣ ខែកញ្ញា បន្ទាប់ពីបានច្រានចោលកិច្ចព្រមព្រៀងកិច្ចសន្យា ដោយបញ្ឈប់ការផលិតយន្តហោះ Boeing 737 MAX។

នេះគឺជាការតវ៉ាលើកដំបូងរបស់ក្រុមហ៊ុន Boeing គិតចាប់តាំងពីឆ្នាំ២០០៨ ហើយប្រធានផ្នែកហិរញ្ញវត្ថុរបស់ Boeing លោក Brian West បានព្រមានថា កូដកម្មរយៈពេលយូរ អាចប៉ះពាល់ដល់ទិន្នផល និង «ធ្វើឲ្យប៉ះពាល់ដល់ការងើបឡើងវិញនៃសេដ្ឋកិច្ចរបស់យើង»។

កាលពីថ្ងៃសុក្រ (ទី១៣ ខែកញ្ញា) លោក Ross O'Connor ប្រធានផ្នែកហិរញ្ញវត្ថុនៃក្រុមហ៊ុនផ្ដល់សេវាជួល នៅប្រទេសអៀរឡង់ គឺក្រុមហ៊ុន Avolon បានប្រាប់សារព័ត៌មាន Reuters ថា៖ «Boeing គឺជាក្រុមហ៊ុនដ៏សំខាន់ជាប្រព័ន្ធ សម្រាប់អាកាសចរណ៍ពិភពលោក។ កូដកម្មអាចជះឥទ្ធិពលដល់កម្រិតផលិតកម្ម ដែលអាចធ្វើឲ្យកាន់តែអាក្រក់ឡើង ចំពោះការខ្វះខាតការផ្គត់ផ្គង់មួយចំនួនដែលមាននៅក្នុងទីផ្សារនាពេលបច្ចុប្បន្ន»។

គួរបញ្ជាក់ថា ក្រុមហ៊ុនអាកាសចរណ៍បានជួបការលំបាកក្នុងការពង្រីកសមត្ថភាព ដើម្បីបំពេញតម្រូវការដែលកំពុងកើនឡើង ខណៈដែលការផ្គត់ផ្គង់យន្តហោះដឹកអ្នកដំណើរ ត្រូវបានកាត់បន្ថយ ដោយកង្វះខាតគ្រឿងបន្លាស់ បញ្ហាជ្រើសរើសបុគ្គលិកទូទាំងឧស្សាហកម្ម និងកន្លែងថែទាំផ្ទុកលើសចំណុះ៕