យោធាអាមេរិក កាលពីថ្ងៃសុក្រ (ទី១៣ ខែកញ្ញា) បាននិយាយថា មេដឹកនាំក្រុម ISIS ចំនួន ៤នាក់ ត្រូវបានសម្លាប់នៅក្នុងការវាយឆ្មក់រួមគ្នា រវាងសហរដ្ឋអាមេរិក និងអ៊ីរ៉ាក់ នៅភាគខាងលិចប្រទេសអ៊ីរ៉ាក់ ក្នុងខែសីហា ក្នុងនោះរួមមានទាំងមេប្រតិបត្តិការរបស់ក្រុមជីហាដ នៅក្នុងប្រទេសនេះផងដែរ។

នៅក្នុងសេចក្តីថ្លែងការណ៍អំពីការវាយឆ្មក់ កាលថ្ងៃទី២៩ ខែសីហា ដែលបានបង្ហោះនៅលើបណ្ដាញសង្គម X បញ្ជាការកណ្តាលរបស់សហរដ្ឋអាមេរិក ឬ Centcom បានឲ្យដឹងថា៖ «ប្រតិបត្តិការនេះបានកំណត់គោលដៅទៅលើមេដឹកនាំក្រុម ISIS និងបានអនុវត្ត ដើម្បីបង្អាក់ និងធ្វើឲ្យខូចសមត្ថភាពរបស់ក្រុម ISIS ក្នុងការរៀបចំផែនការ ចាត់តាំង និងធ្វើការវាយប្រហារប្រឆាំងនឹងជនស៊ីវិលអ៊ីរ៉ាក់»។

បើតាម Centcom បានឲ្យដឹងថា ភ្នាក់ងាររបស់ក្រុម ISIS សរុបចំនួន ១៤នាក់ហើយ ត្រូវបានសម្លាប់ ដោយតួលេខនេះត្រូវបានកែប្រែពីចំនួន ១៥នាក់ ដែលបានរាយការណ៍ពីមុន។ ចំណែកទាហានអាមេរិកមានរងរបួស ៥នាក់ ខណៈ ២នាក់ផ្សេងទៀតរងរបួស ដោយសារធ្លាក់ដោយចៃដន្យក្នុងប្រតិបត្តិការនោះ។

ប្រតិបត្តិការនេះ បានកើតឡើង ក្នុងពេលមានការចរចាដែលកំពុងបន្តមាន រវាងទីក្រុងបាកដាដ និងទីក្រុងវ៉ាស៊ីនតោន ជុំវិញវត្តមានរបស់កងកម្លាំងចម្រុះប្រឆាំងជីហាដ នៅក្នុងប្រទេសអ៊ីរ៉ាក់។ បើទោះជាអ៊ីរ៉ាក់បានកំណត់គោលដៅដកទ័ពទាំងស្រុងក៏ដោយ ក៏គ្មានការកំណត់ពេលវេលាជាក់លាក់ណាមួយ ត្រូវបានផ្សព្វផ្សាយជាសាធារណៈនោះដែរ។

គួរបញ្ជាក់ថា សហរដ្ឋអាមេរិកមានកងទ័ពប្រហែល ២.៥០០នាក់ នៅក្នុងប្រទេសអ៊ីរ៉ាក់ និង ៩០០នាក់ នៅក្នុងប្រទេសស៊ីរី ដែលជាផ្នែកមួយនៃក្រុមចម្រុះអន្តរជាតិប្រឆាំងនឹងក្រុម ISIS៕