អំឡុងសន្និសីទសារព័ត៌មានដែលចេញផ្សាយពីតួលេខសេដ្ឋកិច្ច សម្រាប់ខែសីហា ការិយាល័យស្ថិតិជាតិ (NBS) របស់ប្រទេសចិន នៅថ្ងៃសៅរ៍ (ទី១៤ ខែកញ្ញា) នេះ បានឲ្យដឹងថា អាកាសធាតុអាក្រក់ធ្ងន់ធ្ងរ ក្នុងនោះរួមមានទាំងការធ្លាក់ភ្លៀងខ្លាំង និងទឹកជំនន់ផងដែរ ប៉ះពាល់ដល់កំណើនសេដ្ឋកិច្ចរបស់ប្រទេស។

ជាមួយគ្នានេះ អ្នកនាំពាក្យការិយាល័យ លោកស្រី Liu Aihua ក៏បាននិយាយផងដែរថា រដ្ឋាភិបាលក្នុងតំបន់ ដែលមានវិបត្តិសាច់ប្រាក់ បានចេញមូលបត្របំណុលលឿនជាងមុន ក្នុងខែសីហា សម្រាប់ការសាងសង់គម្រោងធំៗ ដោយបានបន្ថែមដល់ការពន្លឿននូវការចេញសញ្ញាប័ណ្ណ (ប័ណ្ណទទួលស្គាល់បំណុល) និងគំនិតផ្តួចផ្តើមគោលនយោបាយ ដែលនឹងជួយគាំទ្រដល់កំណើនវិនិយោគ។

សូចនាករសេដ្ឋកិច្ចមួយចំនួនផ្សេងទៀត ដែលបានចេញផ្សាយនៅថ្ងៃសៅរ៍នេះដែរ គឺមិនសូវមានភាពអំណោយផលនោះឡើយ។ NBS បានឲ្យដឹងថា អត្រាគ្មានការងារធ្វើដែលផ្អែកលើការស្ទង់មតិទូទាំងប្រទេសរបស់ចិន បានកើនឡើងដល់ ៥,៣ភាគរយ ក្នុងខែសីហា ដោយឡើងពី ៥,២ភាគរយ នៅខែមុនហ្នឹង ហើយស្ថាប័នេះបានបន្ថែមថា និស្សិតបញ្ចប់ការសិក្សានៅមហាវិទ្យាល័យកាន់តែច្រើន បានចូលទីផ្សារការងារ ដើម្បីស្វែងរកការផ្ដល់សំណើ។

តែទោះជាយ៉ាងណាក្ដី វិស័យអចលនទ្រព្យដែលមានបញ្ហា នៅតែជាកត្តាជំរុញដ៏សំខាន់ សម្រាប់កំណើនសេដ្ឋកិច្ច។ តម្លៃផ្ទះថ្មីរបស់ចិន បានធ្លាក់ចុះក្នុងល្បឿនលឿនបំផុត ក្នុងរយៈពេលជាង ៩ឆ្នាំ ក្នុងខែសីហា។ ហើយមានតែទីក្រុង២ ប៉ុណ្ណោះ ក្នុងចំណោមទីក្រុងចំនួន ៧០ ដែលត្រូវបានស្ទង់មតិ បានរាយការណ៍ថា តម្លៃផ្ទះឡើងខ្ពស់ ទាំងក្នុងលក្ខខណ្ឌប្រចាំខែ និងប្រចាំឆ្នាំ នៅក្នុងខែសីហានោះ៕