ក្នុងខណៈពេលដែលលោកបានបង្ហាញទណ្ឌកម្មថ្មី ដែលផ្ដោតលើយុទ្ធនាការបង្កើនឥទ្ធិពលក្រៅប្រទេសរបស់រុស្ស៊ី រដ្ឋមន្ត្រីការបរទេសអាមេរិក លោក Antony Blinken កាលពីថ្ងៃសុក្រ (ទី១៣ ខែកញ្ញា) បាននិយាយថា ប្រទេសនានា គួរតែពិភាក្សារដោះស្រាយ ចំពោះសកម្មភាពរបស់ប្រព័ន្ធផ្សព្វផ្សាយរដ្ឋរុស្ស៊ី RT ខណៈដែលពួកគេធ្វើប្រតិបត្តិការស៊ើបការណ៍សម្ងាត់លាក់មុខ។

គួរបញ្ជាក់ថា សហរដ្ឋអាមេរិកកាលពីសប្តាហ៍មុន បានចោទប្រកាន់ពីបទសម្អាតលុយកខ្វក់ ប្រឆាំងនឹងបុគ្គលិក ២នាក់របស់ប្រព័ន្ធផ្សព្វផ្សាយ RT និងបានដាក់ទណ្ឌកម្មលើនិពន្ធនាយក លោកស្រី Margarita Simonyan ជុំវិញអ្វីដែលមន្ត្រី បានលើកឡើងថា ជាគម្រោងជួលក្រុមហ៊ុនអាមេរិក ដើម្បីផលិតមាតិកាតាមអនឡាញ ក្នុងគោលបំណងជះឥទ្ធិពលដល់ការបោះឆ្នោត នៅសហរដ្ឋអាមេរិកឆ្នាំ២០២៤។

លោក Blinken បានប្រាប់អ្នកសារព័ត៌មាននៅក្រសួងការបរទេសថា ស្ថាប័នប្រព័ន្ធផ្សព្វផ្សាយរុស្ស៊ី «កំពុងដើរតួនាទី ដូចអាវុធជាក់ស្តែងនៃប្រតិបត្តិការស៊ើបការណ៍សម្ងាត់របស់រុស្ស៊ី»។

ដោយលើកឡើងពីព័ត៌មានថ្មីៗ ដែលភាគច្រើនលោកបាននិយាយថា បានមកពីបុគ្គលិករបស់ប្រព័ន្ធផ្សព្វផ្សាយ RT នោះ លោក Blinken បានបន្ថែមថា RT បានដើរហួសពីតួនាទីជាស្ថាប័នសារព័ត៌មាន ដោយបានគ្រប់គ្រងសមត្ថភាពផលិតព័ត៌មានតាមប្រព័ន្ធអ៊ីនធឺណេត ហើយធ្វើប្រតិបត្តិការព័ត៌មានសម្ងាត់ និងផ្ដល់ការជះឥទ្ធិពល នៅក្រៅប្រទេសផងដែរ។

លោក Blinken បានសង្កត់ធ្ងន់ថា៖ «ថ្ងៃនេះ យើងកំពុងប្រកាសថា ប្រព័ន្ធផ្សព្វផ្សាយដែលគាំទ្រដោយវិមានក្រឹមឡាំងទាំងនេះ មិនត្រឹមតែដើរតួផ្ដល់ការជះឥទ្ធិពលលាក់មុខ ដើម្បីបំផ្លាញលទ្ធិប្រជាធិបតេយ្យនៅក្នុងសហរដ្ឋអាមេរិកប៉ុណ្ណោះទេ ប៉ុន្តែថែមទាំងជ្រៀតជ្រែក ក្នុងកិច្ចការអធិបតេយ្យភាពនៃប្រទេសនានា ជុំវិញពិភពលោកផងដែរ»៕