អាជ្ញាធរគ្រប់គ្រងគ្រោះមហន្តរាយ និងទំនប់វារីអគ្គិសនីវៀតណាម (VDDMA) បានរាយការណ៍ថា គិតត្រឹមថ្ងៃទី ១៤ ខែកញ្ញា ចំនួនអ្នកស្លាប់ដោយសារព្យុះទីហ្វុង Yagi នៅប្រទេសវៀតណាមបានកើនឡើងដល់ ២៦២ នាក់ ខណៈមនុស្ស ៨៣ នាក់ផ្សេងទៀតកំពុងបាត់ខ្លួន។ 

ខេត្ត ឡៅ កៃ (Lao Cai) ជាតំបន់ដែលរងគ្រោះខ្លាំងបំផុតដោយមានអ្នកស្លាប់១១១នាក់ និងបាត់ខ្លួន៦១នាក់។

បន្ទាប់មកខេត្ត យិនបៃ (Yen Bai) មានអ្នកស្លាប់ ៥៣នាក់ និងបាត់ខ្លួន ២នាក់ ហើយខេត្ត កៅបាង (Cao Bang) មានអ្នកស្លាប់ ៤៣នាក់ និងបាត់ខ្លួន ៩នាក់។  

ព្យុះទីហ្វុង ដែលជាព្យុះដ៏ខ្លាំងបំផុតក្នុងរយៈពេល ៣០ ឆ្នាំបានបំផ្លាញផ្ទះសម្បែងប្រជាពលរដ្ឋចំនួន ១៦៨.០០០ខ្នង និងផ្ទះចំនួន ៧៣.២៤៨ ខ្នង ផ្សេងទៀតបានលិចក្រោមទឹកជន់លិច។ 

ចំណែកនៅក្នុងវិស័យកសិកម្មវិញ ព្យុះទីហ្វុងបានបង្កការខូចខាតយ៉ាងធ្ងន់ធ្ងរដល់ដំណាំស្រូវចំនួន ១៨៣.០០០ ហិចតា ដំណាំរួមផ្សំចំនួន ៤៤.០០០ ហិចតា ដំណាំហូបផ្លែចំនួន ២៣.៦៦១ ហិចតា។  

ទ្រុងវារីវប្បកម្ម ឬអាងចិញ្ចឹមត្រី ប្រហែល ២.២៥០ កន្លែង ត្រូវបានបំផ្លាញ ឬត្រូវបានទឹកហូរកួចហើយគោ-ក្របី ចំនួន៩.០០០ក្បាល  និងបសុសត្វជិត ២ លានក្បាលបានងាប់៕