មន្ត្រីជាន់ខ្ពស់អង្គការសហប្រជាជាតិបាននិយាយនៅចុងសប្ដាហ៍នេះថា គ្រូបង្រៀន និងបុគ្គលិកអង្គការសហប្រជាជាតិផ្សេងទៀតដែលធ្វើការនៅតំបន់ហ្កាហ្សា ភ័យខ្លាចថាពួកគេពេលនេះក្លាយជាគោលដៅ បន្ទាប់ពីការវាយប្រហារតាមអាកាសរបស់អ៊ីស្រាអែល ចំលើទីជម្រកដែលផ្លាស់ប្តូរពីសាលារៀនសម្រាប់ជនភៀសខ្លួនដ៏ច្រើននៅដែនដីនេះ ក្នុងសប្តាហ៍នេះ។  

ការវាយប្រហារកាលពីថ្ងៃពុធលើសាលារៀន Al-Jawni គ្រប់គ្រងដោយអង្គការសហប្រជាជាតិនៅកណ្តាលតំបន់ហ្កាហ្សា ដែលកំពុងផ្ដល់ជាលំនៅឋានដល់ជនភៀសខ្លួនប៉ាឡេស្ទីន បានសម្លាប់មនុស្ស ១៨នាក់ រួមទាំងបុគ្គលិក៦នាក់របស់ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) ។ 

នេះជាឧបទ្ទវហេតុធ្ងន់ធ្ងរបំផុតតែមួយគត់សម្រាប់ទីភ្នាក់ងារនេះក្នុងរយៈពេលជាង ១១ ខែនៃសង្រ្គាម និងបានទាក់ទាញការថ្កោលទោសពីអន្តរជាតិ។  

ក្រោយចុះពិនិត្យស្ថានភាពនៅជំរំ Nuseirat នាយករងជាន់ខ្ពស់ UNRWA លោក Sam Rose បានប្រាប់សារព័ត៌មាន AFP កាលពីថ្ងៃសៅរ៍ថា សហការីម្នាក់បាននិយាយថា ពួកគេមិនពាក់អាវកាក់ UNRWA ទៀតទេ ព្រោះពួកគេមានអារម្មណ៍ថា ពួកគេបានក្លាយទៅជាគោលដៅនៃការវាយប្រហារ៕