បេក្ខជនប្រធានាធិបតីមកពីគណបក្សសាធារណរដ្ឋ លោក Donald Trump និយាយថា រូបលោកមានសុវត្ថិភាព និងសុខភាពល្អជាធម្មតា កាលពីថ្ងៃអាទិត្យ ១៥ ខែកញ្ញា បន្ទាប់ពីទីភ្នាក់ងារ FBI បាននិយាយថា ទំនងជាការប៉ុនប៉ងធ្វើឃាតលើកទីពីរ ខណៈរូបលោកកំពុងវាយកូនហ្គោលនៅលើទីលានរបស់លោកនៅទីក្រុង West Palm Beach រដ្ឋ Florida ។

មន្ត្រីអនុវត្តច្បាប់បាននិយាយថា ភ្នាក់ងារសម្ងាត់របស់សហរដ្ឋអាមេរិកបានប្រទះឃើញ និងបាញ់ទៅលើខ្មាន់កាំភ្លើងនៅក្នុងគុម្ពោតព្រៃជាច្រើនកន្លែងនៅជិតភូមិគ្រឹះរបស់លោក ដែលជនសង្ស័យបានទម្លាក់កាំភ្លើងម៉ាក AK-47 ចុះ ហើយត្រូវបានចាប់ខ្លួនបន្ទាប់ពីបានរត់គេចពីកន្លែងកើតហេតុ។

សារព័ត៌មាន New York Times និង Fox News បានកំណត់អត្តសញ្ញាណជនសង្ស័យថា ជាបុរសវ័យ៥៨ ឆ្នាំ ឈ្មោះរៃអានវ៉េស្លីរ៉ូត (Ryan Wesley Routh) មកពីរដ្ឋ Hawaii ដោយសំអាងប្រភពពីមន្ត្រីអនុវត្តច្បាប់មិនបញ្ចេញឈ្មោះ។

FBIបានបដិសេធមិនធ្វើអត្ថាធិប្បាយលើអត្តសញ្ញាណរបស់ជនសង្ស័យ ហើយភ្នាក់ងារអនុវត្តច្បាប់ផ្សេងទៀតដែលពាក់ព័ន្ធ ពុំបានឆ្លើយតបទៅនឹងសំណើសុំការអត្ថាធិប្បាយទេ។

លោកRic Bradshaw ស្នងការនគរបាលស្រុក Palm Beach បានប្រាប់សន្និសីទសារព័ត៌មាន បន្ទាប់ពីបានប្រទះឃើញអាវុធនៅចម្ងាយប្រហែល ៣៦០ទៅ៤៥០ ម៉ែត្រពីលោកTrump ខណៈ ពួកគេបានសម្អាតការគំរាមកំហែងដែលអាចកើតមានមុនពេលការលេងរបស់លោក ដែលភ្នាក់ងារនានាបានតបតជាមួយខ្មាន់កាំភ្លើងហើយបានបាញ់យ៉ាងហោចណាស់៤គ្រាប់នៅម៉ោងប្រហែល១និង៣០នាទីរសៀល ៕