នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា ប្រទេសរបស់លោក នឹងធ្វើឱ្យក្រុមហ៊ូទី ដែលជាសម្ព័ន្ធមិត្តរបស់អ៊ីរ៉ង់ រងការខាតបង់ធ្ងន់ធ្ងរ បន្ទាប់ពីពួកគេបានបាញ់មីស៊ីលចូលទៅដល់ប្រទេសអ៊ីស្រាអែលភាគកណ្តាលជាលើកដំបូង កាលពីថ្ងៃអាទិត្យ។ ផ្សែង បានហុយឡើង ហើយអគ្គិភ័យ ត្រូវបានគេឃើញនៅទីវាលនៅជិតស្រុក ក្វា ឌែនញែល (Kfar Daniel) ។

ស៊ីរ៉ែនវាយឆ្មក់តាមអាកាស បានរោទិ៍ឡើងក្នុងទីក្រុង Tel Aviv និងទូទាំងអ៊ីស្រាអែលភាគកណ្តាល ក្រោយម៉ោង ៦ និង ៣០ នាទីព្រឹក ម៉ោងក្នុងស្រុក ដោយបានធ្វើឲ្យអ្នកស្រុករត់ទៅរកទីជម្រក។

គ្មានអ្នករងរបួស ត្រូវបានគេរាយការណ៍នោះទេ។ បន្ទាប់ពីបាននិយាយលើកដំបូងថា មីស៊ីល បានធ្លាក់នៅតំបន់ទីវាល ក្រោយមកយោធាអ៊ីស្រាអែល បាននិយាយថា វាប្រហែលជាបំណែកមីស៊ីលពីលើអាកាស ជាបំណែកនៃការស្ទាក់ចាប់បាន ធ្លាក់នៅទីវាល និងនៅជិតស្ថានីយ៍រថភ្លើង។

នៅក្នុងកិច្ចប្រជុំគណៈរដ្ឋមន្ត្រីប្រចាំសប្តាហ៍ លោក Netanyahu បាននិយាយថា ក្រុមហ៊ូទី គួរតែដឹងថា អ៊ីស្រាអែលនឹងកំណត់ ឲ្យក្រុមនេះទទួលការខាតបង់ធ្ងន់ធ្ងរ សម្រាប់ការវាយប្រហារណាមួយ ទៅលើអ៊ីស្រាអែល។

អ្នកនាំពាក្យយោធាក្រុមហ៊ូទី លោក Yahya Sarea បាននិយាយថា ក្រុមនេះ បានវាយប្រហារដោយមីស៊ីលបាលីស្ទីកល្បឿនលឿនជាងសំឡេងថ្មីមួយ កាលពីថ្ងៃអាទិត្យ ដែលបានហោះក្នុងចម្ងាយជិត ១.៣០០ម៉ាយក្នុងរយៈពេលត្រឹមតែ១១នាទីកន្លះ ប៉ុណ្ណោះ។ លោក Sarea និយាយថា អ៊ីស្រាអែលគួរតែរំពឹងទុកថា នឹងមានការវាយប្រហារបន្ថែមទៀតនៅពេលអនាគត ខណៈយើងខិតជិតដល់ខួបលើកទី១នៃប្រតិបត្តិការថ្ងៃទី៧ ខែតុលា ដោយនិយាយសំដៅ នៅពេលដែលក្រុមសកម្មប្រយុទ្ធហាម៉ាស បានបើកការវាយប្រហារដ៏បង្ហូរឈាមនៅភាគខាងត្បូងប្រទេសអ៊ីស្រាអែល បង្កឱ្យមានជម្លោះ នៅក្នុងតំបន់ហ្កាហ្សា។