សេវាព័ត៌មានរបស់នគរបាល បាននិយាយថា ក្រុមមន្ត្រីអនុវត្តច្បាប់អ៊ីស្រាអែល បានឃាត់ខ្លួនមនុស្ស ១៥នាក់ បន្ទាប់ពីការប្រមូលផ្តុំគ្នាដ៏ធំមួយ នៅក្នុងទីក្រុងតែលអាវីវ ( Tel Aviv) កាលពីយប់ថ្ងៃសៅរ៍។

យោងតាមសេចក្តីថ្លែងការណ៍ អ្នកជាប់ឃុំទាំងនោះ បានសម្រេចចិត្តបន្តនៅតាមដងផ្លូវក្នុងទីក្រុងនេះ បើទោះបីជាការជួបជុំនេះ ត្រូវបានប្រកាសថា បានបញ្ចប់ក៏ដោយ ដោយបំពានលើសណ្តាប់ធ្នាប់សាធារណៈ និងព្យាយាមបិទចរាចរណ៍។ ពួកគេ បានដុតភ្លើងនៅតាមដងផ្លូវ មិនបានគោរពតាមបញ្ជារបស់នគរបាល ហើយថែមទាំងប៉ះទង្គិចជាមួយមន្ត្រីអនុវត្តច្បាប់ទៀតផង។

នគរបាល បាននិយាយថា៖«សិទ្ធិក្នុងការតវ៉ា និងបញ្ចេញមតិដោយសេរី មិនបញ្ជាក់ពីការអនុញ្ញាតឲ្យដុតភ្លើង បិទផ្លូវធំៗ ទម្លុះខ្សែរបាំងរបសនគរបាល និងរំលោភសិទ្ធិអ្នកដទៃ ក្នុងការដើរហើរដោយសេរីនោះទេ»។ «រាល់ការប៉ុនប៉ងប្រើការតវ៉ាជាលេសសម្រាប់ការបំពានសណ្តាប់ធ្នាប់សាធារណៈ សមនឹងទទួលបានការថ្កោលទោស»។

ប្រជាជនអ៊ីស្រាអែលរាប់ពាន់នាក់ បានដើរតាមផ្លូវទូទាំងប្រទេសកាលពីយប់ថ្ងៃសៅរ៍ ដោយទាមទារឲ្យ រដ្ឋាភិបាល ធានាការដោះលែងចំណាប់ថ្នូរអ៊ីស្រាអែលជាបន្ទាន់ ដែលនៅតែឃុំខ្លួននៅតំបន់ហ្កាហ្សាស្ទ្រីប ដោយយល់ព្រមតាមបុរេលក្ខខណ្ឌដែលកំណត់ដោយចលនាបដិវត្តន៍ប៉ាឡេស្ទីនហាម៉ាស( HAMAS) ។