ព្យុះទីហ្វុង Yagi និងឥទ្ធិពលរបស់ព្យុះ បានបង្កការបំផ្លិចបំផ្លាញដ៏ធំនៅទូទាំងខាងជើងប្រទេសវៀតណាម ដែលប៉ាន់ប្រមាណថាមានចំនួន ៤០សែនកោដិ៍ដុង ពោលគឺ ១,៦ពាន់លានដុល្លារអាមេរិក ដែលគំរាមកំហែងកំណើនសេដ្ឋកិច្ចរបស់ប្រទេសសម្រាប់ឆ្នាំនេះ។ ការខាតបង់នេះអាចកាត់បន្ថយ ១៥ភាគរយពីកំណើនសេដ្ឋកិច្ចឆ្នាំ២០២៤ នេះបើយោងតាមប្រព័ន្ធផ្សព្វផ្សាយរដ្ឋដោយដកស្រង់ការប៉ាន់ស្មានដោយក្រសួងផែនការ និងវិនិយោគ។

កំណើននៅត្រីមាសទី៣ អាចមើលឃើញការខាតបង់ ៣៥ភាគរយ ខណៈពេលដែលត្រីមាសទី៤ អាចនឹងឃើញការប៉ះពាល់ ២២ភាគរយ។ រដ្ឋាភិបាលពីមុនបានកំណត់គោលដៅពង្រីកសេដ្ឋកិច្ចនៅឆ្នាំ២០២៤ នេះដល់ទៅ ៧ភាគរយ។

ភ្លៀងធ្លាក់ជាច្រើនថ្ងៃ បានបន្ថែមពីលើការបំផ្លិចបំផ្លាញដ៏ទូលំទូលាយដែលបង្កឡើងដោយព្យុះ Yagi ខណៈទឹកជំនន់ដ៏គំហុក និងបំណាក់ដីបានកើតឡើងពាសពេញតំបន់ភាគខាងជើង ដែលនាំឱ្យមានការជម្លៀសមនុស្សរាប់ពាន់នាក់ ហើយមនុស្សរាប់រយនាក់បានស្លាប់ និងបាត់ខ្លួន។ ព្យុះដ៏មានឥទ្ធិពលបំផុតរបស់វៀតណាមក្នុងរយៈពេលជាច្រើនទស្សវត្សរ៍នេះគឺជាសញ្ញាមួយផ្សេងទៀតដែលបង្ហាញថាការឡើងកម្ដៅផែនដីកំពុងធ្វើឱ្យព្យុះស៊ីក្លូនត្រូពិច - ហៅម្យ៉ាងទៀតថា ព្យុះសង្ឃរា ឬព្យុះទីហ្វុង - កាន់តែខ្លាំងក្លាឡើង។ 

រដ្ឋាភិបាលបាននិយាយថា ការដាច់ចរន្តអគ្គិសនីនៅតែមាននៅក្នុងតំបន់មួយចំនួន ការដឹកជញ្ជូនត្រូវបានរំខានដោយផ្លូវទឹកលិច និងខូចខាត ខណៈក្រុមហ៊ុនផលិតដូចជាអ្នកផ្គត់ផ្គង់របស់ Apple និង Samsung Electronics ដែលមានទីតាំងនៅក្នុងសួនឧស្សាហកម្មខេត្ត គឺមិនមានការរងគ្រោះអ្វីធំដុំឡើយ៕