ប្រព័ន្ធផ្សព្វផ្សាយក្នុងស្រុក បានរាយការណ៍ថា យ៉ាងហោចណាស់មនុស្ស២០នាក់ បានរងរបួស កាលពីថ្ងៃអាទិត្យ ដោយសារតែការផ្ទុះនៅរោងចក្រផលិតប៉ាស្តា ក្នុងខេត្ត Sakarya ភាគពាយ័ព្យប្រទេស ទួរគី។

ទូរទស្សន៍បានផ្សាយថា ឧបទ្ទវហេតុនេះ បានកើតឡើងនៅរោងចក្រ Oba Pasta ក្បែរផ្លូវហាយវ៉េ Anatolian ក្នុងតំបន់ឧស្សាហកម្មនៃស្រុក Hendek ។ 

យោងតាមបណ្តាញផ្សព្វផ្សាយព័ត៌មាន បានឲ្យដឹងថា ការផ្ទុះបានកើតឡើងនៅឡចំហាយសម្រាប់ការផលិតមួយ ហើយបណ្តាលឱ្យមានអគ្គិភ័យឆាបឆេះ។

រថយន្តពន្លត់អគ្គិភ័យ និងរថយន្តគិលានសង្គ្រោះ ត្រូវបានបញ្ជូនទៅកាន់កន្លែងកើតហេតុភ្លាមៗ។ ចំនួនកម្មករពិតប្រាកដ ដែលមានវត្តមាននៅពេលនៃការផ្ទុះនោះ នៅមិនទាន់ដឹងច្បាស់នៅឡើយ ខណៈ អ្នករងរបួស រួមមានទាំងកម្មករ និងបុគ្គលិក ត្រូវបានបញ្ជូនទៅកាន់មន្ទីរពេទ្យនៅក្បែរនោះ។