ទិន្នន័យរបស់រដ្ឋាភិបាលបង្ហាញថា ចំនួនប្រជាជននៅក្នុងប្រទេសជប៉ុន ដែលមានអាយុចាប់ពី ៦៥ឆ្នាំឡើងទៅ បានកើនឡើងដល់កម្រិតខ្ពស់បំផុតចំនួន ៣៦,២៥លាននាក់ក្នុងឆ្នាំ២០២៤ ខណៈប្រទេសនេះកំពុងក្លាយជាសង្គមមានប្រជាជនវ័យចំណាស់ច្រើនបំផុតមួយរបស់ពិភពលោក។

យោងតាមទិន្នន័យដែលចេញផ្សាយដោយក្រសួងកិច្ចការផ្ទៃក្នុង និងទំនាក់ទំនងកាលពីថ្ងៃអាទិត្យ (១៥ កញ្ញា) បានឱ្យដឹងថា មនុស្សវ័យចំណាស់ឥឡូវនេះមាន ២៩,៣ភាគរយនៃចំនួនប្រជាជនសរុបរបស់ជប៉ុន ដែលក៏ជាកម្រិតខ្ពស់ថ្មីមួយផងដែរ។ ក្រសួងបាននិយាយថា សមាមាត្រនៃអ្នកស្រុកវ័យចំណាស់បានធ្វើឱ្យជប៉ុន ស្ថិតនៅលើកំពូលនៃបញ្ជីប្រទេស និងតំបន់ចំនួន២០០ ដែលមានប្រជាជនជាង ១០០.០០០នាក់។

ប្រទេសអ៊ីតាលី ព័រទុយហ្គាល់ ក្រិក ហ្វាំងឡង់ អាល្លឺម៉ង់ និងក្រូអាស៊ី តំណាងឱ្យទ្វីបអឺរ៉ុបក្នុងចំណាត់ថ្នាក់កំពូលទាំង១០ ជាមួយនឹងអត្រាជាង ២០ភាគរយ។ កូរ៉េខាងត្បូងមាន ១៩,៣ភាគរយ និងចិន ១៤,៧ភាគរយ។

ជប៉ុនកំពុងប្រឈមមុខនឹងវិបត្តិចំនួនប្រជាជនកាន់តែអាក្រក់ឡើងជាលំដាប់ ខណៈកំណើនមនុស្សចាស់នាំឱ្យថ្លៃព្យាបាល និងសុខុមាលភាពកើនឡើង ជាមួយនឹងកម្លាំងពលកម្មធ្លាក់ចុះក្នុងការទប់ទល់លើចំណាយទាំងនោះ។ ទិន្នន័យរបស់រដ្ឋាភិបាលកាលពីមុនបង្ហាញថា ប្រជាជនសរុបរបស់ជប៉ុនបានធ្លាក់ចុះ ៥៩៥.០០០នាក់ ទៅតួលេខ ១២៤លាននាក់។ រដ្ឋាភិបាលជប៉ុនបានព្យាយាមពន្យឺតការធ្លាក់ចុះ និងភាពចាស់នៃចំនួនប្រជាជនរបស់ខ្លួន ប៉ុន្តែមិនទាន់បានជោគជ័យនោះឡើយ៕