ប្រព័ន្ធផ្សព្វផ្សាយរដ្ឋបានរាយការណ៍ថា អ៊ីស្រាអែលបានទម្លាក់ខិត្តប័ណ្ណ នៅភូមិព្រំដែនលីបង់ កាលពីថ្ងៃអាទិត្យ (ទី១៥ ខែកញ្ញា) ដោយជំរុញឲ្យអ្នកស្រុកចាកចេញ ប៉ុន្តែយោធារបស់អ៊ីស្រាអែល បានប្រាប់សារព័ត៌មាន AFP ថា កងពលតូចបានអនុវត្តគំនិតផ្តួចផ្តើមនេះដោយគ្មានការយល់ព្រមនោះឡើយ។

នេះជាលើកទីមួយហើយដែលអ៊ីស្រាអែលបានប្រាប់ឲ្យអ្នកស្រុកនៅភាគខាងត្បូងលីបង់ជម្លៀសចេញ ក្នុងរយៈពេល ១១ខែនៃការបាញ់គ្នាឆ្លងព្រំដែន រវាងក្រុមហេសបូឡា និងអ៊ីស្រាអែល ជុំវិញសង្រ្គាម នៅតំបន់ហ្កាហ្សា ដែលបង្កឡើងដោយការវាយប្រហាររបស់សម្ព័ន្ធមិត្តរបស់ក្រុមនេះ គឺក្រុមហ៊ុនហាម៉ាស កាលពីថ្ងៃទី៧ ខែតុលាលើអ៊ីស្រាអែល។

ដោយសំដៅទៅលើភូមិព្រំដែនភាគខាងត្បូងប្រទេស ទីភ្នាក់ងារព័ត៌មានជាតិផ្លូវការ បានឲ្យដឹងថា៖ «សត្រូវអ៊ីស្រាអែល បានទម្លាក់ខិត្តប័ណ្ណនៅលើភូម Wazzani ដោយអំពាវនាវឲ្យអ្នកទាំងនៅក្នុង និងជុំវិញតំបន់ជម្លៀសចេញ»។ មេភូមិ Wazzani លោក Ahmed al-Mohammed បានចែករំលែកជាមួយសារព័ត៌មាន AFP នូវរូបភាពនៃខិត្តប័ណ្ណដែលបង្ហាញផែនទីនៃតំបន់ ដោយមានការគូសចំណាំនៃការជម្លៀសពណ៌ក្រហម។

ខិត្តប័ណ្ណនោះសរសេរជាភាសាអារ៉ាប់ថា៖ «ជូនចំពោះអ្នកស្រុក និងជនភៀសខ្លួនទាំងអស់ដែលរស់នៅក្នុងតំបន់ជំរំ ក្រុមហេសបូឡាកំពុងបាញ់ចេញពីតំបន់របស់អ្នក។ អ្នកត្រូវតែចាកចេញពីផ្ទះរបស់អ្នកជាបន្ទាន់ ហើយធ្វើដំណើរទៅភាគខាងជើងនៃតំបន់ Khiam មុនម៉ោង ៤រសៀល (ម៉ោងក្នុងស្រុក)។ ហើយកុំត្រឡប់ទៅតំបន់នេះវិញ រហូតដល់ចប់សង្គ្រាម»៕