មន្ត្រីសុខាភិបាល ក្នុងតំបន់ នៅថ្ងៃចន្ទ (ទី១៦ ខែកញ្ញា) នេះ បានប្រាប់ឲ្យដឹងថា និស្សិតវ័យ ២៤ឆ្នាំម្នាក់បានវបាត់បង់ជីវិតដោយសារវីរុស Nipah (នីប៉ា) នៅរដ្ឋ Kerala ភាគខាងត្បូងប្រទេសឥណ្ឌា ហើយមនុស្ស ១៥១នាក់ដែលបានប៉ះពាល់ជាមួយជនរងគ្រោះ កំពុងស្ថិតក្រោមការតាមដាន ដើម្បីការពារការរីករាលដាលនៃវីរុសដែលបង្កគ្រោះថ្នាក់ដល់ជីវិតនេះ។

នេះជាការស្លាប់ទី២ ដែលបង្កឡើងដោយវីរុស Nipah ក្នុងរដ្ឋ Kerala ចាប់តាំងពីខែកក្កដាមក។ វីរុស Nipah ត្រូវបានចាត់ថ្នាក់ជាភ្នាក់ងារបង្កជំងឺជាអាទិភាពពីអង្គការសុខភាពពិភពលោក (WHO) ដោយសារតែសក្តានុពលរបស់វា ក្នុងការបង្កឲ្យមានការឆ្លងរាលដាល។ មិនទាន់មានវ៉ាក់សាំងការពារការឆ្លងវីរុសនេះ និងគ្មានវិធីព្យាបាលនោះទេ។

ការស៊ើបអង្កេតរបស់សារព័ត៌មាន Reuters ក្នុងឆ្នាំ២០២៣ បានបង្ហាញថា ផ្នែកជាច្រើននៃរដ្ឋ Kerala ស្ថិតក្នុងចំណោមតំបន់ដែលមានហានិភ័យបំផុតនៅលើពិភពលោក សម្រាប់ការផ្ទុះឡើងនូវវីរុសនេះ។ វីរុស Nipah ដែលឆ្លងពីសត្វប្រចៀវ និងសត្វចតុបាតផ្សេងទៀត ដូចជាជ្រូកជាដើម អាចបណ្តាលឲ្យស្លាប់ និងបង្កឲ្យមានអាការគ្រុនក្តៅដែលហើមខួរក្បាល ចំពោះមនុស្ស។

វេជ្ជបណ្ឌិតលោកស្រី R. Renuka មន្ត្រីពេទ្យស្រុក នៅទីក្រុង Malappuram ដែលមានទីតាំងនៅភាគខាងជើងរដ្ឋ Kerala បាននិយាយថា និស្សិតរូបនោះដែលចាប់ផ្តើមបង្ហាញរោគសញ្ញាគ្រុនក្តៅ នៅថ្ងៃទី៤ ខែកញ្ញា និងបានស្លាប់ ៥ថ្ងៃក្រោយមក រស់នៅក្នុងរដ្ឋ Kerala។

លោកស្រីវេជ្ជបណ្ឌិត Renuka បានបន្ថែមថា សំណាកឈាមពីជនរងគ្រោះ ដែលបានបញ្ជូនទៅវិទ្យាស្ថានជាតិនៃមេរោគវិទ្យា នៅទីក្រុង Pune ដើម្បីធ្វើតេស្ត បានបញ្ជាក់អះអាងពីការឆ្លងវីរុស Nipah កាលពីថ្ងៃទី៩ ខែកញ្ញា៕