ក្រុមអាជ្ញាធរបាននិយាយកាលពីថ្ងៃចន្ទសប្ដាហ៍នេះថា ទឹកជំនន់ដែលបង្កឡើងដោយព្យុះ Boris នៅភាគកណ្តាលអឺរ៉ុប បានពេញប្រៀបហៀរទំនប់ទឹក កាត់ផ្តាច់ចរន្តអគ្គិសនី និងបានសម្លាប់មនុស្សយ៉ាងហោចណាស់ ១៨ នាក់ ខណៈមនុស្សកាន់តែច្រើនត្រូវបានជម្លៀសចេញពីទីជម្រក។

ខ្យល់បោកបក់ និងភ្លៀងធ្លាក់ខ្លាំងខុសពីធម្មតា បានវាយប្រហារលើតំបន់មួយចំនួននៃប្រទេសអូទ្រីស សាធារណរដ្ឋឆែក ហុងគ្រី ប៉ូឡូញ រូម៉ានី និងស្លូវ៉ាគី ចាប់តាំងពីថ្ងៃសុក្រសប្ដាហ៍មុនមក។

ភ្លៀងបានជន់លិចផ្លូវ និងភូមិឋានទាំងមូលនៅកន្លែងមួយចំនួន ខណៈបិទការដឹកជញ្ជូនសាធារណៈ និងអគ្គិសនីនៅកន្លែងផ្សេងទៀត។

យោងតាមតួលេខចុងក្រោយបំផុតបានឱ្យដឹងថា ព្យុះនេះបានបណ្តាលឱ្យមនុស្សស្លាប់ចំនួន ៧ នាក់នៅក្នុងប្រទេសរូម៉ានី ៤នាក់នៅប៉ូឡូញ ៤ នាក់នៅអូទ្រីស និង ៣ នាក់នៅសាធារណរដ្ឋឆែក ស្របពេលដែលមនុស្សមួយចំនួននៅតែបាត់ខ្លួននៅឡើយ។

ក្រុមអ្នកជំនាញនិយាយថា បម្រែបម្រួលអាកាសធាតុបណ្តាលមកពីការបំភាយឧស្ម័នផ្ទះកញ្ចក់ដែលបង្កើតឡើងដោយសកម្មភាពរបស់មនុស្សកំពុងបង្កើនភាពញឹកញាប់ និងអាំងតង់ស៊ីតេនៃព្រឹត្តិការណ៍អាកាសធាតុធ្ងន់ធ្ងរដូចជាភ្លៀងធ្លាក់ខ្លាំង និងទឹកជំនន់ជាដើម៕