រយៈពេលមួយថ្ងៃបន្ទាប់ពីអ្វីដែលហាក់ដូចជាការប៉ុនប៉ងធ្វើឃាតលើកទីពីរក្នុងរយៈពេលត្រឹមតែពីរខែ យុទ្ធនាការរបស់លោក Donald Trump និងសម្ព័ន្ធមិត្តបាននិយាយថា លោកនឹងបន្តធ្វើយុទ្ធនាការនៅសប្តាហ៍នេះតាមការគ្រោងទុក ហើយក៏ប្រហែលជាបន្តលេងកីឡាវាយកូនហ្គោលទៀតដែរ។

លោក Trump បានជួបជាមួយប្រធានស្តីទីសេវាសម្ងាត់អាមេរិកនៅឯនិវេសនដ្ឋានក្នុងក្រុង Palm Beach រដ្ឋ Florida របស់លោក និងបានផ្តល់បទសម្ភាសន៍ឱ្យប្រព័ន្ធផ្សព្វផ្សាយ ហើយបានលើកឡើងពីឧប្បត្តិហេតុនេះម្តងប៉ុណ្ណោះនៅលើបណ្ដាញសង្គម Truth Social។

លោកបានអះអាងដោយគ្មានភ័ស្តុតាងនៅក្នុងបទសម្ភាសន៍ជាមួយ Fox News ថា ខ្មាន់កាំភ្លើងដែលជាប់សង្ស័យ បានធ្វើសកម្មភាពមកពីឥទ្ធិពលនៃ «ភាសាបញ្ឆេះកំហឹងដ៏ខ្លាំងក្លា» របស់បក្សប្រជាធិបតេយ្យ ដែលបន្ទាប់មកលោកក៏បានប្រើវោហាសាស្ត្រដ៏ក្តៅគគុករបស់ខ្លួននៅក្នុងការបង្ហោះប្រព័ន្ធផ្សព្វផ្សាយសង្គម។ លោក Trump បានសរសេរក្នុងការបង្ហោះថា «ដោយសារវោហារសាស្ត្ររបស់ក្រុមកុម្មុយនិស្តឆ្វេងនិយមទាំងនោះ ទើបធ្វើឱ្យគ្រាប់កាំភ្លើងហោះផ្ដេសផ្ដាស ហើយនឹងកាន់តែអាក្រក់ទៅៗ!»។

បន្ថែមពីលើការអំពាវនាវរៃអង្គាសថវិកា យុទ្ធនាការរបស់លោកក៏បានបញ្ជាក់បន្ថែមពីការអត្ថាធិប្បាយមុនៗដោយបេក្ខជនប្រធានាធិបតីនៃបក្សប្រជាធិបតេយ្យ លោកស្រី Kamala Harris លោកប្រធានាធិបតី Joe Biden និងអ្នកប្រជាធិបតេយ្យផ្សេងទៀត ដែលយុទ្ធនាការលោក Trump បាននិយាយថាបានជំរុញឱ្យអ្វីដែលទំនងជាការប៉ុនប៉ងធ្វើឃាតនេះកើតឡើង។

គួររម្លឹកថា លោកស្រី Harris និងអ្នកប្រជាធិបតេយ្យផ្សេងទៀតបានចាត់ទុកលោក Trump ថាជាគ្រោះថ្នាក់ដល់លទ្ធិប្រជាធិបតេយ្យរបស់អាមេរិក ដោយលើកឡើងពីកិច្ចខិតខំប្រឹងប្រែងរបស់លោកដើម្បីបង្វែរលទ្ធផលឆ្នោតឆ្នាំ២០២០ ដែលនាំទៅដល់ការវាយលុកកាលពីថ្ងៃទី០៦ ខែមករា ឆ្នាំ២០២១ លើវិមានកាពីតូល របស់សហរដ្ឋអាមេរិក៕