កូដកម្មរបស់បុគ្គលិកក្រុមហ៊ុន ប៊ូអ៊ីង (Boeing) ជាង ៣០.០០០នាក់ បានឈានចូលថ្ងៃទី៤កាលពីថ្ងៃចន្ទ (១៦ កញ្ញា) និងបង្កការប៉ះពាល់យ៉ាងខ្លាំងដល់ក្រុមហ៊ុនផលិតយន្តហោះមួយនេះ។

Boeing និងថ្នាក់ដឹកនាំសហជីពបានវាយតម្លៃខុសយ៉ាងធ្ងន់ធ្ងរចំពោះឥទ្ធិពលដែលបង្កឡើងដោយការតវ៉ារបស់សមាជិកសហជីព ដោយបានបង្អាក់ការផលិតយន្តហោះស៊េរី ៧៣៧ របស់ខ្លួន ខណៈក្រុមហ៊ុនកំពុងព្យាយាមបង្កើនល្បឿននៃការដំឡើង។ ឥឡូវនេះ ក្រុមនាយកប្រតិបត្តិត្រូវស្វែងរកវិធីដើម្បីទប់ស្កាត់ការបញ្ឈប់ការងារ ជាមួយនឹងការផ្តល់ជូនថ្មីនៅក្នុងកិច្ចពិភាក្សាដែលនឹងបន្តនៅថ្ងៃអង្គារ (១៧ កញ្ញា) នេះ។

លោក Jon Holden អ្នកចរចានាំមុខគេនៃសហជីព បាននិយាយកាលពីថ្ងៃសៅរ៍ថា កម្មករចង់ឱ្យក្រុមហ៊ុន Boeing បង្កើនការផ្តល់ជូនប្រាក់ឈ្នួលរបស់ខ្លួន និងផ្តល់អត្ថប្រយោជន៍លើប្រាក់សោធននិវត្តន៍ ដែលត្រូវបានដកហូតកាលពីមួយទសវត្សរ៍មុន ជាថ្នូរនឹងការរក្សាផលិតកម្មយន្តហោះនៅក្នុងរដ្ឋវ៉ាស៊ីនតោន។

ប្រភពសហជីពចំនួនពីរបានប្រាប់សារព័ត៌មានរ៉យទ័រថា ពួកគេមិនរំពឹងថាក្រុមហ៊ុន Boeing នឹងស្ដារប្រាក់សោធននិវត្តន៍ចាស់នោះវិញទេ ប៉ុន្តែការទាមទារនោះអាចត្រូវបានប្រើប្រាស់ដើម្បីចរចាលើការរួមចំណែកប្រាក់សោធននិវត្តន៍របស់ក្រុមហ៊ុនច្រើនជាងមុន និងប្រាក់ឈ្នួលខ្ពស់ជាងនេះ។

នាយកប្រតិបត្តិមួយចំនួនបានព្រមានភ្លាមៗអំពីវដ្តនៃការចាកចេញពីការងារដ៏គ្រោះថ្នាក់មួយ ខណៈឧស្សាហកម្មប្រភេទនេះកំពុងទប់ទល់នឹងការប្រកួតប្រជែងពីវិស័យផ្សេងទៀត ដើម្បីទាក់ទាញបុគ្គលិក និងវិស្វករយន្តហោះថ្មីៗ៕