ក្រសួងការបរទេសសហរដ្ឋអាមេរិក បាននិយាយកាលពីថ្ងៃចន្ទ (១៦ កញ្ញាំ) ថា ខ្លួនបានអនុម័តលទ្ធភាពនៃការលក់យុទ្ធោបករណ៍យោធាបរទេសទៅឱ្យកោះតៃវ៉ាន់ នូវគ្រឿងបន្លាស់ដែលមានតម្លៃប្រហែល ២២៨លានដុល្លារ ដែលយោធារបស់កោះតៃវ៉ាន់ បាននិយាយថានឹងជួយរក្សាការត្រៀមខ្លួនប្រយុទ្ធក្នុងការប្រឈមមុខនឹងសកម្មភាពយោធាតំបន់ពណ៌ប្រផេះរបស់ចិន។

ក្រសួងការបរទេសបាននិយាយក្នុងសេចក្តីថ្លែងការណ៍មួយថា ការដូរត្រឡប់មកវិញ ការជួសជុល និងការដឹកជញ្ជូនគ្រឿងបន្លាស់ នឹងត្រូវផ្ទេរពីឃ្លាំងស្តុករបស់រដ្ឋាភិបាលអាមេរិក ដោយបន្ថែមថា យោធាតៃវ៉ាន់នឹងមិនពិបាកក្នុងការសម្របឧបករណ៍ទាំងនេះទៅក្នុងកងកម្លាំងប្រដាប់អាវុធរបស់ខ្លួនទេ។

សហរដ្ឋអាមេរិកគឺជាអ្នកគាំទ្រ និងជាអ្នកផ្គត់ផ្គង់អាវុធដ៏សំខាន់បំផុតរបស់តៃវ៉ាន់ បើទោះបីជាខ្លួនមិនមានទំនាក់ទំនងផ្លូវការជាមួយកោះនេះក៏ដោយ។ អាជ្ញាធរការពារជាតិតៃវ៉ាន់បានថ្លែងអំណរគុណចំពោះកញ្ចប់លក់អាវុធ ដែលខ្លួនរំពឹងថានឹង «ចូលជាធរមាន» ក្នុងរយៈពេលមួយខែ។

ប្រទេសចិន ដែលចាត់ទុកកោះស្វ័យគ្រប់គ្រងតៃវ៉ាន់ថាជាទឹកដីរបស់ខ្លួន បានបង្កើនសម្ពាធផ្នែកយោធា និងនយោបាយក្នុងពេលប្រាំឆ្នាំចុងក្រោយនេះ ដើម្បីបញ្ជាក់ការអះអាងសិទ្ធិរបស់ខ្លួន ដែលក្រុងតៃប៉ិបដិសេធ។ ប្រទេសចិន បាននិងកំពុងបង្កើនសង្រ្គាមតំបន់ប្រផេះ ដោយប្រើយុទ្ធសាស្ត្រដែលមិនដូចការប្រយុទ្ធជាក់ស្តែង ដើម្បីសាកល្បង និងដាក់សម្ពាធលើកងកម្លាំងតៃវ៉ាន់ រួមទាំងការល្បាតពីកងកម្លាំងខ្លួនជាទៀងទាត់នៅជិតកោះ ឃិនមិន (Kinmen) គ្រប់គ្រងដោយតៃវ៉ាន់ ដែលនៅទល់មុខប្រទេសចិន៕