ប្រធានទីភ្នាក់ងារជនភៀសខ្លួនប៉ាឡេស្ទីន UNRWA របស់អង្គការសហប្រជាជាតិ បាននិយាយកាលពីថ្ងៃចន្ទ (១៦ កញ្ញា) ថាការគ្របដណ្តប់នៃការចាក់វ៉ាក់សាំងការពារជំងឺស្វិតដៃជើង នៅក្នុងតំបន់ហ្កាហ្សា បានឈានដល់ ៩០ភាគរយ ដោយបន្ថែមថាជំហានបន្ទាប់គឺធានាថាឱ្យកុមាររាប់សែននាក់បានទទួលការចាក់វ៉ាក់សាំងលើកទីពីរនៅចុងខែនេះ។

យុទ្ធនាការចាក់វ៉ាក់សាំងកុមារប្រមាណ ៦៤០.០០០នាក់នៅតំបន់ហ្កាហ្សាអាយុក្រោម ១០ឆ្នាំប្រឆាំងនឹងជំងឺស្វិតដៃជើង ដែលបានចាប់ផ្តើមនៅថ្ងៃទី០១ ខែកញ្ញា បានបង្ហាញពីបញ្ហាប្រឈមធំៗដល់ទីភ្នាក់ងារ UNRWA និងដៃគូរបស់ខ្លួន ដោយសារតែជម្លោះដ៏បង្ហូរឈាមដែលកំពុងបន្តរវាងអ៊ីស្រាអែល និងក្រុមហាម៉ាស។

កុមារប៉ាឡេស្ទីនជាង ៤៤៦.០០០នាក់នៅភាគកណ្តាល និងខាងត្បូងហ្កាហ្សា ត្រូវបានចាក់ថ្នាំបង្ការនៅដើមខែនេះ មុនពេលយុទ្ធនាការចាក់វ៉ាក់សាំងចុងក្រោយដល់កុមារ ២០០.០០០នាក់នៅភាគខាងជើងហ្កាហ្សាបានចាប់ផ្តើមនៅថ្ងៃទី១០ ខែកញ្ញា បើទោះបីជាមានការរឹតបន្តឹងការចូលទៅកាន់តំបន់នោះ ការបញ្ជាជម្លៀស និងកង្វះខាតប្រេងឥន្ធនៈក៏ដោយ។

លោក Philippe Lazzarini ប្រធាន UNRWA បាននិយាយថា យុទ្ធនាការចាក់វ៉ាក់សាំងការពារជំងឺស្វិតដៃជើងលើកទីមួយនៅហ្កាហ្សាបានបញ្ចប់ដោយជោគជ័យ ដោយបន្ថែមថា ៩០ភាគរយនៃកុមាររបស់សហគមន៍បានទទួលការចាក់វ៉ាក់សាំងលើកដំបូង។

យុទ្ធនាការវ៉ាក់សាំងនេះបានកើតឡើងបន្ទាប់ពីការបញ្ជាក់របស់អង្គការសុខភាពពិភពលោក (WHO) កាលពីខែមុនថា ទារកម្នាក់ត្រូវបានខ្វិនដោយផ្នែកមកពីវីរុសស្វិតដៃជើងប្រភេទទី២ ដែលជាករណីបែបនេះជាលើកដំបូងនៅក្នុងទឹកដីប៉ាឡេស្ទីនក្នុងរយៈពេល ២៥ឆ្នាំ៕