ភ្នាក់ងារពិសេសរបស់ FBI លោក ជឺហ្វ្រី វ៉ែលទ្រី (Jeffrey Veltri) បានប្រាប់សន្និសីទសារព័ត៌មានមួយថា FBI មិនមានព័ត៌មានថា ជនសង្ស័យដែលប៉ុនប៉ងធ្វើឃាតបេក្ខជនប្រធានាធិបតីនៃគណបក្សសាធារណរដ្ឋលោក  ដូណាល់ ត្រាំ (Donald Trump) បានប្រព្រឹត្តនៅក្នុងការឃុបឃិតជាមួយអ្នកផ្សេងនោះទេ។

លោក បានសង្កត់ធ្ងន់ថា៖ «នៅពេលនេះ យើងកំពុងតែស្រាវជ្រាវរឿងនេះ យើងក៏កំពុងស៊ើបអង្កេតករណីនេះដែរ។ ការស៊ើបអង្កេតរបស់យើង នឹងកំណត់ថា យើងមិនមានព័ត៌មានថា ជនសង្ស័យនេះ កំពុងប្រព្រឹត្តជាមួយអ្នកណាផ្សេង នៅពេលនេះទេ»។

កាលពីថ្ងៃទី ១៥ ខែកញ្ញា ការិយាល័យស៊ើបអង្កេតសហព័ន្ធអាមេរិក បានរាយការណ៍ពីការបាញ់ប្រហារនៅខាងក្រៅក្លិបវាយកូនហ្គោលអន្តរជាតិ Trump ក្នុងទីក្រុង Palm Beach ដែលជាកន្លែងដែលអ្នកនយោបាយរូបនេះ ស្នាក់នៅ។ ឧប្បត្តិហេតុដែលបានកើតឡើងប្រហែលពីរខែ បន្ទាប់ពីការប៉ុនប៉ងធ្វើឃាតលោក ត្រាំ នៅរដ្ឋ Pennsylvania កំពុងត្រូវបានចាត់ទុកថា ជាការប៉ុនប៉ងធ្វើឃាតមួយផ្សេងទៀត។ នគរបាលតំបន់ Palm Beach លោក រិក ប្រាដ ស (Ric Bradshaw) បាននិយាយថា កាំភ្លើង AK-47 ដែលមានកែវពង្រីក កាបូបស្ពាយចំនួនពីរដែលមានចានសេរ៉ាមិចនៅក្នុងនោះ និងកាមេរ៉ាសកម្មភាពមួយ ត្រូវបានគេរកឃើញ នៅជិតក្លិបវាយកូនហ្គោល ជាទីដែលជនសង្ស័យ កំពុងព្យាយាមលាក់។ ជនសង្ស័យមានឈ្មោះ រ៉ៃអាន វ៉េសលី រ៉ោដ (Ryan Wesley Routh) អាយុ ៥៨ឆ្នាំ ហើយត្រូវបានសមត្ថកិច្ចឃាត់  ខ្លួន។