ប្រធានាធិបតីអ៊ីរ៉ង់លោក Masoud Pezeshkian បាននិយាយកាលពីថ្ងៃចន្ទនថា ប្រទេសរបស់លោក មិនបានបញ្ជូនមីស៊ីលល្បឿនលឿនជាងសំឡេង ទៅឲ្យក្រុមហ៊ួទីនៅប្រទេសយេម៉ែនទេ។

លោកបានធ្វើការអត្ថាធិប្បាយនៅក្នុងសន្និសីទសារព័ត៌មានមួយ ខណៈពេលដែលឆ្លើយតបទៅនឹងអ្នកយកព័ត៌មានរបស់បណ្តាញព័ត៌មាន Al Jazeera ដែលបានដកស្រង់អ្នកជំនាញនយោបាយថា អ៊ីរ៉ង់ បានផ្គត់ផ្គង់មីស៊ីលល្បឿនលឿនជាងសំឡេង ឬយ៉ាងហោចណាស់បច្ចេកវិទ្យា ដើម្បីផលិតពួកវា ទៅឲ្យក្រុម  ហ៊ួទី។

លោក Pezeshkian បាននិយាយថា អ៊ីរ៉ង់មានមីស៊ីលល្បឿនលឿនជាងសំឡេង ប៉ុន្តែមិនមែនជាប្រភេទដែលក្រុមហ៊ួទី មាននោះទេ ដោយបន្ថែមថា ក្រុមហ៊ួទីខ្លួនឯង បានផលិតមីស៊ីលជាបន្តបន្ទាប់។

លោកបានបន្តថា អ៊ីរ៉ង់មិនអាចបញ្ជូនមីស៊ីលទៅកាន់ប្រទេសយេម៉ែនដោយសម្ងាត់ទេ នៅពេលដែលខ្លួនចំណាយពេលលើសពីមួយសប្តាហ៍ ដើម្បីបញ្ជូនកងកម្លាំងមនុស្ស ទៅកាន់ប្រទេសនេះ។

ទោះបីជាយ៉ាងណាក៏ដោយ លោក Pezeshkian បាននិយាយថា អ៊ីរ៉ង់ និងក្រុមហ៊ួទី បានសម្របសម្រួល និងជួយគ្នាទៅវិញទៅមក ហើយបានធ្វើការរួមគ្នាប្រឆាំងនឹង «អំពើប្រល័យពូជសាសន៍» របស់អ៊ីស្រាអែល នៅតំបន់ហ្កាហ្សា។