ប្រទេសម៉ាឡេស៊ី នោថ្ងៃអង្គារ (ទី១៧ ខែកញ្ញា) បានរាយការណ៍ពីករណីជំងឺអុតស្វា ឬអឹមផក (Mpox) លើកដំបូងរបស់ខ្លួន នៅឆ្នាំនេះ បន្ទាប់ពីបុរសម្នាក់ដែលមិនបានទៅក្រៅប្រទេស ក្នុងប៉ុន្មានសប្តាហ៍ថ្មីៗនេះ បានធ្វើតេស្តវិជ្ជមានវីរុសបំប្លែងថ្មី Clade II ដែលមិនសូវមានសភាពធ្ងន់ធ្ងរនោះឡើយ។

ក្រសួងសុខាភិបាលម៉ាឡេស៊ី បានឲ្យដឹងនៅក្នុងសេចក្តីថ្លែងការណ៍ថា ករណីនេះត្រូវបានរកឃើញ កាលពីថ្ងៃចន្ទ (ទី១៦ ខែកញ្ញា) នៅក្នុងខ្លួនបុរសម្នាក់ ដែលចាប់ផ្តើមមានរោគសញ្ញាគ្រុនក្តៅ ឈឺបំពង់ក និងក្អក កាលថ្ងៃទី១១ ខែកញ្ញា ដោយមានចេញកន្ទួលលើស្បែក នៅថ្ងៃបន្ទាប់។

ក្រសួងបានបន្ថែមថា អ្នកជំងឺ ដែលជាជនជាតិម៉ាឡេស៊ីរូបនេះ មិនបានធ្វើដំណើរទៅក្រៅប្រទេសនោះឡើយ ក្នុងរយៈពេល ២១ថ្ងៃ មុនពេលមានរោគសញ្ញានេះ។ ប្រទេសម៉ាឡេស៊ីបានរកឃើញជំងឺ Mpox សរុបចំនួន ១០ករណីហើយ ចាប់តាំងពីខែកក្កដាឆ្នាំមុន ដែលទាំងអស់នេះ ជាវីរុសបំប្លែងថ្មី Clade II។ ៩ករណី ត្រូវបានកត់ត្រានៅឆ្នាំ២០២៣។

សម្រាប់សិង្ហបុរី រហូតមកដល់ពេលនេះ មានករណីជំងឺ Mpox ចំនួន ១៥ករណី ដែលសុទ្ធតែជាវីរុសប្រភេទ Clade II។ នៅហ្វីលីពីនឯណោះវិញ នាយកដ្ឋានសុខាភិបាល (DOH) កាលពីថ្ងៃចន្ទ (ទី១៦ ខែកញ្ញា) បានប្រកាសពីជំងឺ Mpox នេះ ចំនួន ៣ករណីបន្ថែមទៀត ដោយនាំឲ្យករណីសរុបដែលត្រូវបានបញ្ជាក់ទូទាំងប្រទេសក្នុងឆ្នាំនេះ កើនដល់ ១៨ករណី។ រដ្ឋមន្ត្រីសុខាភិបាលហ្វីលីពីនបានបញ្ជាក់ថា អ្នកមានជំងឺដែលទើបនឹងអះអាងថ្មីទាំង ៣ករណីនោះ គឺជាបុរសមកពីទីក្រុង Metro Manila និងតំបន់ក្បែរនោះ។ ក្នុងចំណោមអ្នកជំងឺទាំង១៨នាក់ ដែលបានបញ្ជាក់មកដល់ឆ្នាំនេះ មាន ៥នាក់ បានជាសះស្បើយ ហើយមិនមានអ្នកស្លាប់នោះទេ។

នៅថ្ងៃចន្ទនោះដែរ ឥណ្ឌាក៏បានរាយការណ៍ពីករណីដែលត្រូវបានបញ្ជាក់ជាលើកដំបូងនៃជំងឺ Mpox «ទាក់ទងនឹងការធ្វើដំណើរ» នៅក្នុងខ្លួនបុរសវ័យក្មេងម្នាក់ដែលបានធ្វើតេស្តវិជ្ជមាន សម្រាប់ជំងឺឆ្លងមានប្រភពមកពីអាហ្វ្រិកខាងលិច។ រដ្ឋាភិបាលបានពន្យល់ថា ការធ្វើតេស្តបានបញ្ជាក់ពីវត្តមានរបស់វីរុស «Clade II» ហើយថា គឺ «ស្រដៀងទៅនឹង ៣០ករណីដែលបានរាយការណ៍មុននេះ នៅក្នុងប្រទេសឥណ្ឌា ចាប់ពីខែកក្កដា ឆ្នាំ២០២២ មក»៕