ប្រទេសឥណ្ឌាបានថ្កោលទោសការអត្ថាធិប្បាយរបស់មេដឹកនាំកំពូលរបស់អ៊ីរ៉ង់ លោក Ali Khamenei ស្តីពីការប្រព្រឹត្ត ចំពោះអ្នកកាន់សាសនាអ៊ិស្លាម នៅក្នុងប្រទេសអាស៊ីខាងត្បូងមួយនេះ ដោយហៅការលើកឡើងរបស់លោកថា «ជាការផ្ដល់ព័ត៌មានខុស និងមិនអាចទទួលយកបាន»។

នៅក្នុងការបង្ហោះតាមបណ្ដាញសង្គម កាលពីថ្ងៃចន្ទ (ទី១៧ ខែកញ្ញា) លោក Khamenei បានលើកឡើងថា៖ «យើងមិនអាចចាត់ទុកខ្លួនយើង ជាអ្នកកាន់សាសនាអ៊ិស្លាមបានទេ ប្រសិនបើយើងព្រងើយកន្តើយ ចំពោះការឈឺចាប់ដែលជនមូស្លីម កំពុងជួបប្រទះនៅសហភាពមីយ៉ាន់ម៉ា តំបន់ហ្កាហ្សា ប្រទេសឥណ្ឌា ឬកន្លែងផ្សេងទៀត»។

ជាការឆ្លើយតប ក្រសួងការបរទេសរបស់ឥណ្ឌាបាននិយាយថា ខ្លួន «មានការខកចិត្តយ៉ាងខ្លាំង» ចំពោះការអត្ថាធិប្បាយនេះ។ អ្នកនាំពាក្យក្រសួងការបរទេសបានប្រាប់ថា៖ «បណ្តាប្រទេសដែលផ្តល់យោបល់លើជនជាតិភាគតិច ត្រូវបានណែនាំឲ្យមើលកំណត់ត្រាផ្ទាល់ខ្លួនរបស់ពួកគេ មុនពេលធ្វើការសង្កេតអំពីអ្នកដទៃ»។

គួរបញ្ជាក់ថា ប្រទេសទាំង២ ជាធម្មតាបានចែករំលែកនូវទំនាក់ទំនងដ៏រឹងមាំមួយ ហើយបានចុះហត្ថលេខាលើកិច្ចសន្យារយៈពេល ១០ឆ្នាំ នៅក្នុងខែឧសភា ដើម្បីអភិវឌ្ឍ និងដំណើរការកំពង់ផែ Chabahar របស់អ៊ីរ៉ង់។

តែយ៉ាងណាក្ដី លោក Khamenei បានរិះគន់ឥណ្ឌានាពេលកន្លងមក ជុំវិញបញ្ហាពាក់ព័ន្ធនឹងជនមូស្លីមឥណ្ឌា និងតំបន់មានបញ្ហាដែលមានអ្នកកាន់សាសនាអ៊ិស្លាមភាគច្រើន គឺ Kashmir៕