ទីក្រុងមជ្ឈមណ្ឌលហិរញ្ញវត្ថុសៀងហៃ របស់ចិន រងការវាយប្រហារដោយព្យុះទីហ្វុង Bebinca កាលពីថ្ងៃចន្ទម្សិលមិញ ក្នុងនាមព្យុះមានកម្លាំងខ្លាំងក្លាបំផុតនារយៈពេលជាង ៧ទសវត្សរ៍កន្លងមកនេះ ។

សារព័ត៌មានរដ្ឋ រាយការណ៍ថា ព្យុះ Bebinca បានបោកបក់ដល់ដីគោកកាលពីព្រឹកថ្ងៃចន្ទ ជាមួយល្បឿនខ្យល់បក់ ១៥០គ.មក្នុង ១ម៉ោង ។ ខ្យល់បក់ខ្លាំង បានរំលើងដើមឈើជាង ១ម៉ឺនដើមនៅទូទាំងទីក្រុងសៀងហៃ ។

មនុស្សជាង ៤០ម៉ឺននាក់ ត្រូវបានជម្លៀសចេញពីផ្ទះសម្បែងរបស់ពួកគេ នៅតាមផ្លូវរបស់ព្យុះ Bebinca ។

ដោយឡែក ផែនការធ្វើដំណើរ ត្រូវបានអាក់ខាន អំឡុងថ្ងៃឈប់សម្រាករយៈពេល ៣ថ្ងៃនៅសៀងហៃ ក្នុងនោះ ជើងហោះហើរជាង ១.៤០០វ៉ុល និងសេវាកម្មរថភ្លើងរាប់រយខ្សែ ត្រូវបានលុបចោល ហើយស្ថានីយ៍រថភ្លើងក្រោមដី និងផ្លូវជាច្រើនខ្សែ បានបិទដោយសារព្យុះមួយនេះ ។

បើទោះបីជារងផលប៉ះពាល់ដ៏កម្រដោយផ្ទាល់ពីព្យុះទីហ្វុងខ្លំាងក្លាបែបនេះក្តី ពលរដ្ឋរស់នៅក្នុងទីក្រុងសៀងហៃ ដូចជាលោក Fu Qihang ពុំមានការព្រួយបារម្ភនោះឡើយ តែផ្ទុយទៅវិញ លោកបែរជាកោតសរសើរចំពោះហេដ្ឋារចនាសម្ព័ន្ធរបស់ទីក្រុងមួយនេះ ៕