នាយករដ្ឋមន្ត្រីអង់គ្លេស លោក Keir Starmer បានសរសើរគោលនយោបាយអន្តោប្រវេសន៍របស់ប្រទេសអ៊ីតាលី ក្រោមការដឹកនាំរបស់នាយករដ្ឋមន្ត្រីលោកស្រី Giorgia Meloni ក្នុងអំឡុងពេលកិច្ចប្រជុំនៅទីក្រុងរ៉ូម កាលពីថ្ងៃចន្ទ។

មេដឹកនាំទាំងពីរ បានបើកសម័យប្រជុំបិទទ្វារ មុនពេលថ្លែងទៅកាន់ប្រព័ន្ធផ្សព្វផ្សាយ ដោយពិភាក្សាអំពីអន្តោប្រវេសន៍ ជម្លោះរុស្ស៊ី-អ៊ុយក្រែន គោលនយោបាយថាមពល កំណើនសេដ្ឋកិច្ច និងទំនាក់ទំនងក្រោយទំនាក់ទំនងក្រោយ Brexit រវាងចក្រភពអង់គ្លេស និងសហភាពអឺរ៉ុប។

មិនដូចការប្រជុំធម្មតាដែលធ្វើឡើងនៅវិមាន Palazzo Chigi ដែលជាវិមានរបស់រដ្ឋាភិបាលអ៊ីតាលី កិច្ចពិភាក្សាកាលពីថ្ងៃចន្ទ បានធ្វើឡើងនៅវីឡា Doria Pamphili ដ៏ស្រស់ស្អាត។

លោក Starmer ជាមេដឹកនាំគណបក្សការងារ ដែលបានឡើងកាន់តំណែងជានាយករដ្ឋមន្ត្រី នៅថ្ងៃទី៥ ខែកក្កដា បានវិលត្រឡប់ពីទីក្រុងវ៉ាស៊ីនតោន ជាកន្លែងដែលលោក បានជួបជាមួយប្រធានាធិបតីសហរដ្ឋអាមេរិកលោក ចូ បៃដិន (Joe Biden)។ អ៊ុយក្រែន គឺជាប្រធានបទចម្បងនៅក្នុងទីក្រុងវ៉ាស៊ីនតោន ប៉ុន្តែលោក Starmer ត្រូវបានគេរាយការណ៍ថា បានបរាជ័យក្នុងការបញ្ចុះបញ្ចូលលោក បៃដិន ឲ្យបង្កើនជំនួយផ្នែកយោធា និងសេដ្ឋកិច្ច ដល់អ៊ុយក្រែន។