វេទិកាធុរកិច្ចរបស់អ៊ីស្រាអែល នៅថ្ងៃអង្គារ (ទី១៧ ខែកញ្ញា) នេះ បានជំរុញឲ្យនាយករដ្ឋមន្ត្រី លោក Benjamin Netanyahu រក្សាមុខតំណែងរបស់រដ្ឋមន្ត្រីការពារជាតិរបស់លោក ដោយនិយាយថា ការសម្រេចដកតួនាទីនោះ នឹងបង្កើតឲ្យមានការបែកបាក់បន្ថែមទៀត និងធ្វើឲ្យប្រទេសចុះខ្សោយ បន្ទាប់ពីមាននូវរបាយការណ៍ពីប្រទេសដែលជិតកើតមានភាពរង្គោះរង្គើផ្នែកនយោបាយ។

បណ្តាញទូរទស្សន៍ និងគេហទំព័រព័ត៌មានឈានមុខគេរបស់អ៊ីស្រាអែល បានរាយការណ៍ថា លោក Netanyahu ដែលស្ថិតក្រោមសម្ពាធពីដៃគូ ក្នុងរដ្ឋាភិបាលចម្រុះស្តាំនិយមជ្រុល កំពុងពិចារណាពីការបណ្តេញរដ្ឋមន្ត្រីការពារជាតិ លោក Yoav Gallant ហើយដាក់ជំនួសដោយអតីតសម្ព័ន្ធមិត្ត ដែលប្រែក្លាយទៅជាគូប្រជែង គឺលោក Gideon Saar ដែលបច្ចុប្បន្នជាសមាជិកគណបក្សប្រឆាំង។

វេទិកាដែលមានប្រធានក្រុមហ៊ុនធំៗរបស់អ៊ីស្រាអែលចំនួន ២០០ក្រុមហ៊ុន ដែលផ្ដល់ការងារដល់កម្មករ ក្នុងវិស័យឯកជនជាច្រើន បានលើកឡើងថា លោក Netanyahu គួរតែឈប់ «ខាតពេលជាមួយនយោបាយតូចតាច» ក្នុងអំឡុងពេលមានសង្រ្គាម។

វេទិកាបានឲ្យដឹងនៅក្នុងសេចក្តីថ្លែងការណ៍មួយថា៖ «សូមបញ្ឈប់ជាបន្ទាន់នូវដំណើរការនៃការជំនួសតំណែង (លោក Gallant)។ ការបណ្ដេញរដ្ឋមន្ត្រីធ្វើឲ្យអ៊ីស្រាអែលបង្ហាញនូវភាពទន់ខ្សោយ នៅក្នុងខ្សែភ្នែករបស់សត្រូវនានា ហើយនឹងធ្វើឲ្យមានការបែកបាក់កាន់តែជ្រៅ នៅក្នុងរង្វង់ប្រជាជនអ៊ីស្រាអែល»។

យ៉ាងណាក្ដី លោក Netanyahu បានបដិសេធថា លោកមិនបានចរចាជាមួយលោក Saar នោះទេ ទោះបីជាលោកមិនបានសំដៅលើផែនការរបស់លោក សម្រាប់ការជំនួសតំណែងរបស់លោក Gallant ក៏ដោយ។ ចំណែកលោក Saar ក៏បានបដិសេធដែរថា លោកមិនបានចរចាជាមួយសមាជិកនៃក្រុមរដ្ឋាភិបាលចម្រុះនោះឡើយ៕