ប្រមុខអង្គភាពប្រឆាំងគ្រឿងញៀន នៅថ្ងៃអង្គារ (ទី១៧ ខែកញ្ញា) នេះ បានប្រាប់ឲ្យដឹងថា មនុស្ស ៤នាក់ដែលត្រូវបានចាប់ខ្លួនថ្មីៗនេះ ពីបទចោទប្រកាន់គ្រឿងញៀន នៅលើកោះរមណីយដ្ឋានរបស់ឥណ្ឌូនេស៊ី គឺកោះបាលី ប្រឈមនឹងការកាត់ទោសប្រហារជីវិត។

ប្រមុខទីភ្នាក់ងារប្រឆាំងគ្រឿងញៀនកោះបាលី លោក Rudy Ahmad Sudrajat បានប្រាប់អ្នកសារព័ត៌មានថា មន្ត្រីនគរបាលបានចាប់ខ្លួនជនជាតិថៃ ២នាក់ នៅអាកាសយានដ្ឋានអន្តរជាតិកោះ កាលពីថ្ងៃទី៣ ខែកញ្ញា ពីបទកាន់កាប់គ្រឿងញៀន មេតំហ្វេតាមីន អេកស្តាស៊ី និងគ្រីស្តាល់ MDMA។ លោកបានប្រាប់បន្ថែមថា៖ «ថ្នាំនេះនឹងត្រូវប្រគល់ទៅឲ្យជនជាតិឥណ្ឌូនេស៊ី ២នាក់ដែលបានបញ្ជាទិញថ្នាំទាំងនោះ»។

ជនជាតិឥណ្ឌូនេស៊ីម្នាក់ ត្រូវបានចាប់ខ្លួននៅអាកាសយានដ្ឋានដដែលនេះ កាលពីថ្ងៃទី៨ ខែកញ្ញា ខណៈអ្នកនាំផ្លូវម្នាក់ ដែលមិនត្រូវបានប្រាប់សញ្ជាតិ ក៏ត្រូវបានចាប់ខ្លួនផងដែរ។ លោក Sudrajat បាននិយាយថា ជនទាំង ៤រូបនោះ ប្រឈមមុខនឹងការកាត់ទោសប្រហារជីវិត ប្រសិនបើរកឃើញថា មានទោស៕