ភាគច្រើននៃអ្នកស្រុកតំបន់ហ្គាហ្សា ជឿថា ការវាយប្រហាររបស់ក្រុមហាម៉ាសលើអ៊ីស្រាអែល កាលពីថ្ងៃទី៧ ខែតុលា គឺជាការសម្រេចចិត្តមិនត្រឹមត្រូវនោះទេ។ នេះបើយោងតាមការស្ទង់មតិដែលបានចេញផ្សាយ នៅថ្ងៃអង្គារ (ទី១៧ ខែកញ្ញា) ដោយនេះជាការចង្អុលបង្ហាញនូវការធ្លាក់ចុះដ៏ធំ ក្នុងការគាំទ្រដល់ការវាយលុកដែលបានជំរុញឲ្យមានការវាយប្រហារសងសឹករបស់អ៊ីស្រាអែល រហូតធ្វើឲ្យតំបន់ហ្កាហ្សារងការបំផ្លិចបំផ្លាញយ៉ាងធ្ងន់ធ្ងរ។

ការស្ទង់មតិដែលធ្វើឡើងនៅដើមខែកញ្ញានេះ ដោយមជ្ឈមណ្ឌលប៉ាឡេស្ទីន ដើម្បីការស្រាវជ្រាវគោលនយោបាយ និងអង្កេត (PSR) បានរកឃើញថា ៥៧ភាគនៃអ្នកដែលត្រូវបានស្ទង់មតិ នៅតំបន់ហ្កាហ្សាស្ទ្រីប បាននិយាយថា ការសម្រេចចិត្តចាប់ផ្តើមការវាយលុកនេះ គឺមិនត្រឹមត្រូវឡើយ ខណៈដែល ៣៩ភាគរយ បាននិយាយថា សមហេតុផល។

នេះជាលើកដំបូងហើយ គិតចាប់តាំងពីថ្ងៃទី៧ ខែតុលា ដែលការស្ទង់មតិរបស់ PSR បានរកឃើញអ្នកឆ្លើយសំណួរ នៅតំបន់ហ្កាហ្សាភាគច្រើនដែលវិនិច្ឆ័យការសម្រេចចិត្តនេះថា ជារឿងមិនត្រឹមត្រូវ។ ការស្ទង់មតិបានបង្ហាញថា លទ្ធផលនេះត្រូវបានអមដោយការធ្លាក់ចុះនៃការគាំទ្រ សម្រាប់ការវាយប្រហារ នៅតំបន់ West Bank ទោះបីជាភាគច្រើននៃអ្នកឆ្លើយតបចំនួន ៦៤ភាគរយនៅទីនោះ នៅតែគិតថា វាជាការសម្រេចចិត្តដ៏ត្រឹមត្រូវក៏ដោយ។

គួរបញ្ជាក់ថា ការស្ទង់មតិពីមុនរបស់ PSR ដែលធ្វើឡើងក្នុងខែមិថុនា បានបង្ហាញថា ៥៧ភាគរយនៃអ្នកឆ្លើយតប នៅតំបន់ហ្កាហ្សា គិតថា ការសម្រេចចិត្តនេះគឺត្រឹមត្រូវ។

PSR បានឲ្យដឹងថា ខ្លួនបានស្ទង់មតិលើមនុស្ស ១.២០០នាក់ទល់មុខគ្នា ដោយ ៧៩០នាក់ នៅតំបន់ West Bank និង ៤១០នាក់ នៅតំបន់ហ្កាហ្សា ខណៈកម្រិតល្អៀងនៃកំហុសឆ្គងមាន ៣,៥ភាគរយ៕