ប្រមុខរដ្ឋបាល ក្នុងតំបន់ និងជាមេដឹកនាំសង្គមស៊ីវិល នៅថ្ងៃអង្គារ (ទី១៧ ខែកញ្ញា) នេះ បានប្រាប់ឲ្យដឹងថា ជនស៊ីវិល ១០នាក់ ត្រូវបានសម្លាប់ នៅក្នុងការវាយប្រហារពាក់នាកណ្តាលអធ្រាត្រ ដោយកងជីវពល CODECO លើភូមិមួយ ក្នុងខេត្ត Ituri ភាគខាងកើតនៃសាធារណរដ្ឋប្រជាធិបតេយ្យកុងហ្គោ។

CODECO គឺជាអង្គភាពមួយ ក្នុងចំណោមកងជីវពលជាច្រើនដែលកំពុងប្រយុទ្ធគ្នាដណ្ដើមដែនដី និងប្រភពធនធាន នៅភាគខាងកើតកុងហ្គោ។ កន្លងមក ក្រុមនេះត្រូវបានអង្គការសហប្រជាជាតិ (UN) ចោទប្រកាន់ថា បានវាយប្រហារប្រឆាំងនឹងសហគមន៍ផ្សេងទៀត ក្នុងនោះរួមទាំងសហគមន៍ចិញ្ចឹមសត្វ Hema ដែលអាចបង្កើតជាឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។

យោងតាមប្រធានរដ្ឋបាល លោក Jean Marie Mateso និងមេដឹកនាំសង្គមស៊ីវិល លោក Jules Tsuba បានប្រាប់ឲ្យដឹងថា នៅវេលាប្រហែលពាក់កណ្តាលអធ្រាត្រ យុទ្ធជននៃក្រុមប្រដាប់អាវុធមួយនេះ បានចូលទៅក្នុងភូមិមួយ ក្នុងដែនដី Djugu ជាកន្លែងដែលអ្នកស្រុកភាគច្រើនមកពីសហគមន៍ Hema ហើយបានសម្លាប់មនុស្ស ១០នាក់ ដែលជាសមាជិកនៃគ្រួសារចំនួន២។ 

លោក Mateso បាននិយាយថា៖ «ឥឡូវនេះ មានការខឹងសម្បាយ៉ាងខ្លាំង ខណៈមានពាក្យចចាមអារ៉ាមជាច្រើនថា ភូមិផ្សេងទៀតនឹងត្រូវបានវាយប្រហារដែរ»។ លោកបានបន្ថែមថា ការសម្លាប់នេះបានកើតឡើងនៅមិនឆ្ងាយពីទីតាំងយោធាកុងហ្គោនោះឡើយ៕