ប្រភពសន្តិសុខលីបង់ជាន់ខ្ពស់ និងប្រភពផ្សេងទៀតបានប្រាប់សារព័ត៌មានរ៉យទ័រថា ទីភ្នាក់ងារចារកម្ម ម៉ូសាដ (Mossad) របស់អ៊ីស្រាអែល បានលួចបង្កប់សារធាតុផ្ទុះក្នុងបរិមាណតិចតួចនៅក្នុងឧបករណ៍ចាប់សញ្ញាអគ្គិសនី (Pager ឬហៅថាឧបករណ៍ទាក់ទង) ផលិតដោយកោះតៃវ៉ាន់ ចំនួន ៥០០០គ្រឿង ដែលបញ្ជាទិញដោយក្រុមសកម្មប្រយុទ្ធ ហេសបូឡា (Hezbollah) នៃប្រទេសលីបង់ ជាច្រើនខែមុនពេលការបំផ្ទុះកាលពីថ្ងៃអង្គារ (១៧ កញ្ញា)។

ព័ត៌មានលម្អិតនេះបានលេចឡើង ក្រោយការរំលោភបំពានសន្តិសុខមិនធ្លាប់មានពីមុនមកលើក្រុមហេសបូឡា ដែលមើលឃើញឧបករណ៍ចាប់សញ្ញារាប់ពាន់គ្រឿងបានផ្ទុះនៅទូទាំងប្រទេសលីបង់ សម្លាប់មនុស្ស ៩នាក់ និងរបួសជិត ៣.០០០នាក់ផ្សេងទៀត រួមទាំងក្រុមអ្នកប្រយុទ្ធ និងបេសកជនអ៊ីរ៉ង់ប្រចាំទីក្រុងបេរូតផងដែរ។

ក្រុមហេសបូឡា ដែលគាំទ្រដោយអ៊ីរ៉ង់ បានប្តេជ្ញាសងសឹកអ៊ីស្រាអែល ខណៈយោធាអ៊ីស្រាអែលបដិសេធមិនធ្វើអត្ថាធិប្បាយលើការបំផ្ទុះនោះទេ។ ប្រភពជាច្រើនបានប្រាប់សារព័ត៌មានរ៉យទ័រថា ផែនការនេះហាក់ដូចជាមានរយៈពេលជាច្រើនខែក្នុងការរៀបចំឡើង។

ប្រភពពីរដែលដឹងពីប្រតិបត្តិការរបស់ក្រុមបានប្រាប់រ៉យទ័រថា យុទ្ធជនហេសបូឡាបាននិងកំពុងប្រើប្រាស់ឧបករណ៍ចាប់សញ្ញាជាមធ្យោបាយទំនាក់ទំនងបច្ចេកវិទ្យាទាបក្នុងការប៉ុនប៉ងដើម្បីគេចពីការតាមដានទីតាំងរបស់អ៊ីស្រាអែល។ ប៉ុន្តែប្រភពជាន់ខ្ពស់លីបង់បាននិយាយថា ឧបករណ៍ទាំងនោះត្រូវបានកែប្រែដោយសេវាកម្មចារកម្មរបស់អ៊ីស្រាអែល «នៅកម្រិតផលិតកម្ម»។

ប្រភពបាននិយាយថា ឧបករណ៍ចំនួន ៣.០០០គ្រឿង ដែលមួយចំនួនជាប្រភេទ AP924 ផលិតដោយក្រុមហ៊ុន ហ្គូល អាប៉ូឡូ (Gold Apollo) មានមូលដ្ឋាននៅកោះតៃវ៉ាន់ បានផ្ទុះឡើងនៅពេលដែលសារកូដត្រូវបានផ្ញើទៅឧបករណ៍ទាំងនោះក្នុងពេលដំណាលគ្នា ដែលធ្វើឱ្យគ្រឿងផ្ទុះដំណើរការ។ ប្រភពសន្តិសុខមួយផ្សេងទៀតបានប្រាប់រ៉យទ័រថា សារធាតុផ្ទុះរហូតដល់ទៅ ៣ក្រាម ត្រូវបានបង្កប់នៅក្នុងឧបករណ៍ទាក់ទងនោះ ហើយ «មិនត្រូវបានពិនិត្យឃើញ» ដោយក្រុមហេសបូឡា អស់រយៈពេលជាច្រើនខែ៕