ជឺ​ជិត​ស៊ូ៖ ​ម្ចាស់​មេដាយមាស​កីឡា​អាស៊ី ខាន់ ចេ​សា បាន​ត្រៀមខ្លួន​ជាស្រេចដើម្បី​ចូលរួម​ការប្រកួត​កីឡា​ជឺ​ជិត​ស៊ូ​ដណ្ដើម​ខ្សែក្រវាត់​កម្រិត​ពិភពលោក WNO Championship ប្រភេទ​ទម្ងន់ ១១៥​ផោន ឬ​ទម្ងន់​ប្រមាណ ៥២​គីឡូក្រាមនៅ​ថ្ងៃទី​២៥-២៦ ខែកញ្ញា ឆ្នាំ​២០២១ ចុង​សប្ដាហ៍​នេះនៅ​រដ្ឋ​តិច​សាស់ សហរដ្ឋអាមេរិក។​

​ព្រឹត្តិការណ៍​ដ៏​ធំ​រៀបចំ​ដោយ FloGrappling នេះបាន​សម្រិតសម្រាំង​ជើង​ខ្លាំង ៨​រូបដែល​សុទ្ធតែជា​កីឡាការិនី​លំដាប់​កំពូល​ពិភពលោក​ចូលរួម ដោយ​ក្រៅពី ខាន់ ចេ​សា គឺមាន​កីឡាការិនី​ប្រេ​ស៊ី​លដែល​ឈរ​ចំណាត់ថ្នាក់​លេខ​១ ពិភពលោក Mayssa Bastos, កីឡាការិនី​ចិន ឈរ​លេខ​២ ពិភពលោក Grace Gundrum, កីឡាការិនី Daniele Kelly, Amanda "Tubby" Alequin, Alex Nguyen, Jessica Crane និង​កីឡាការិនី Tammi Musumeci ជាដើម។​ ​ក្នុង​ចំណោម​បេក្ខភាព​ប្រជែង​ខ្សែក្រវាត់ WNO Championship នេះគេ​ឃើញ​កីឡាការិនី Mayssa Bastos គឺជា​បន្លា​ដ៏​ធំ​របស់​កីឡាការិនី​កូនកាត់​បី​សាសន៍​កម្ពុជា​-​ម៉ិ​ក​ស៊ិ​ក​-​អាមេរិក ព្រោះ​ជើង​ខ្លាំង​ប្រេ​ស៊ី​ល​រូបនេះធ្លាប់បាន​ជួប និង​យកឈ្នះ​កីឡាការិនី​ជម្រើសជាតិ​កម្ពុជា ខាន់ ចេ​សា ចំនួន ៣​ដង​មកហើយក្នុង​ឆ្នាំ​២០២១ នេះ។

​តាម​ការបញ្ជាក់​របស់​គណៈកម្មការ​រៀបចំ​កា​រ​ប្រកួត ខាន់ ចេ​សា បាន​ខិតខំ​ប្រឹងប្រែង​ហ្វឹកហាត់​ជាខ្លាំងដើម្បី​ត្រៀម​ការប្រកួត​នេះ ពិសេស​នាង​សង្ឃឹមថា នឹង​បាន​ជួប Mayssa Bastos ម្ដងទៀតក្នុង​វគ្គ​ណាមួយនៃ​ព្រឹត្តិការណ៍​ដ៏​ធំ​នេះ។ តែ​យ៉ាងណា ចេ​សា ក៏​នឹងមិន​មើលរំលង​ដៃគូ​ប្រកួត​ផ្សេងៗ​ទៀតដែល​សុទ្ធតែជា​កីឡាករ​លំដាប់​កំពូល​នោះដែរ។​ ​គួរ​បញ្ជាក់ថា ការប្រកួត​ដណ្ដើម​ខ្សែក្រវាត់​ទម្ងន់​ស្រាល​កម្រិត​ពិភពលោកសម្រាប់​ស្ដ្រី​នេះ កីឡាការិនី​ដែល​ទទួលបាន​ជ័យលាភី​លេខ​១ នឹង​ទទួលបាន​ប្រាក់រង្វាន់​អម​ចំនួន ៣​ម៉ឺន​ដុល្លារ ខណ​លេខ​២ នឹង​ទទួលបាន ១៥,០០០​ដុល្លារ និង​ចំណាត់ថ្នាក់​លេខ​៣ ទទួលបាន​ប្រាក់រង្វាន់ ៧,៥០០​ដុល្លារ៕

​អត្ថបទ៖ លី ឈុន​ឡា